ШК Алкалоид со турнир „Алкалоид 50 на 8 х 8“ во чест на 50 години

ШК Алкалоид го одбележа 50-годишниот јубилеј со уште еден турнир во забрзан шах – „Алкалоид 50 на 8 х 8“, кој се играше во Скопје на 3 октомври.

Пресметка по 11 кола

По одиграни 11 кола првопласиран беше Мухамет Аслани (Косово) со 9,5 поени. ИМ Филип Панчевски заврши со 9 бода и со победата над ВМ Звонко Станојоски во последното коло си го обезбеди второто место.

ФМ Андреј Велјаноски и ИМ Борољуб Златановиќ исто така завршија со по 9 поени; поради послабиот тај брејк, Велјаноски беше рангиран како трет, додека Златановиќ се најде веднаш зад него.

ИМ Никола Николовски и ФМ Ендрит Уручи се поделија на петтото место со по 8,5 бода. Во групата со 8 бода беа ВМ Звонко Станојоски, ИМ Тони Кироски, Филип Михов, Стојанчо Димковски и други. Најуспешен меѓу ветераните беше ФМ Александар Кралевски, а најдобро пласирани шахистки беа Леа Ефтовска и Александра Димитри.

Две специјални награди припаднаа на јуниори од шаховските школи на Алкалоид: младиот талент и младински првак до 12 години Давид Атанасовски беше награден како најдобар играч со рејтинг под 1799 поени, а Акбијуик Фатих (16 години) беше прогласен за најдобар во категоријата рејтинг 1800–1999 поени.

Во рамки на турнирот беше организирана и авторска презентација на Монографијата за клубот, подготвена од ИМ Никола Димовски, како најава за официјалната промоција што ќе следува.

Следната голема активност на клубот е настапот на Европскиот клупски куп во Црна Гора (17–23 октомври), каде што ќе настапи и ШК Мулти Есенс.

Фото: прес-материјал од настанот