Штајнмаер повика на решителна борба против екстремизмот и на продолжување на реформите

На 3 октомври 2026 година, германскиот претседател Франк-Валтер Штајнмаер предупреди дека екстремизмот и популизмот ја загрозуваат демократијата и единството на земјата и повика на продолжување на реформската политика на сојузната влада, дури и ако таа наиде на отпор.

Јасни граници во дијалогот со екстремистите

Во своето обраќање на свеченоста по повод Денот на германското единство во Бремен, Штајнмаер оцени дека постојат „горчливи назадувања“ во однос на надежите за демократија и меѓународна соработка од обединувањето наваму. Тој со остри зборови предупреди на опасност од неуспех на демократијата и ја осуди, како што рече, „неразумна дискредитација на   Сојузна Република Германија“.

Претседателот упати јасна порака до владината коалиција составена од Демохристијаните и Социјалдемократите, нагласувајќи дека сегашните околности бараат „промислена, постојана, професионална и истрајна владина политика“ за отстранување на „подлабоките економски и социјални причини за несигурноста“ кај населението. По новите несогласувања во коалицијата тој рече дека во изминатите денови разговарал со повеќе водечки политичари.

Штајнмаер ги формулираше очекувањата за реформскиот пат: „Реформите секогаш носат ризик – но ние го преземаме тој ризик со надеж дека ќе ја земеме сопствената судбина во свои раце. Кога целта е исправна, мора да се истрае на патот“ – ова важи „и покрај сите апокалиптични сценарија“, нагласи тој. „Затоа велам: Останете одлучни, дури и кога ветрот ни дува в лице – имајте храброст за обнова!“

Тој исто така повлече граница за комуникацијата со екстремистичките сили и укажа на негативни надворешни влијанија врз германската демократија, споменувајќи влијанија од САД и Русија. „Неподносливата политичка демагогија на екстремистичките сили,   кои уживаат во уништувањето и ги исмеваат и заплашуваат другите луѓе, денес не ги загрозува само слободата и демократијата. Таа го загрозува и нашето единство", рече претседателот.

Штајнмаер апелираше и за продолжување на поддршката за Украина, истовремено повикувајќи на поголеми дипломатски напори за обликување на условите за мир и безбедност во Европа. Тој го поздрави и натамошното зајакнување на германските вооружени сили, но додаде дека е потребен „зрел пристап кон односот меѓу воената сила и дипломатската мудрост“.

Фото: прес-материјал од настанот