Силекс со втора победа сезонава — 3:0 против Скопје

Во рамките на третото коло од ПМФЛ, Силекс ја забележа втората победа сезонава — на домашен терен ги победи Скопје со 3:0.

Решавачки голови во второто полувреме

По триумфот во премиерното коло против Башкими и ремито со Шкендија Арачиново, кратовци повторно покажаа сериозна игра пред своите гледачи. Во првиот дел имаше шанси и погодени греди, но мрежите останаа мирни.

Во 48. минута Хасукиќ отвори резултатот. Непосредно потоа Сековски направи пенал врз Џеков и поради тоа беше исклучен; Богдановски реализираше од белата точка за 2:0.

Со играч помалку Скопје се обиде да се врати, но во 78. минута Александар Мишов ги постави конечните 3:0. Избраниците на Александар Васоски имаа уште неколку прилики и промашија шанси за зголемување на предноста.

По три кола Силекс има седум бода, додека тимот на Скопје останува со еден освоен поен.

Фото: прес-материјал од настанот