Силно невреме ја остави Кочани без струја, блокирани повеќе патни правци

Невреме проследено со силен ветер и дожд вечерва нешто по 20 часот го зафати Кочани и регионот, предизвикувајќи проблеми во сообраќајот и секојдневното движење на граѓаните.

Патишта и струја

Градот е без електрична енергија. На магистралниот пат Кочани–Штип сообраќајот е во прекин поради наноси и паднати дрвја на коловозот.

Блокирани се повеќе патни правци околу Кочани. На излезот од градот кон Виница сообраќајот е стопиран поради срушено стебло и гранки непосредно после СОУ "Гошо Викентиев". Каде што е можно, сообраќајот се пренасочува низ градот.

Булеварот „Тодосија Пунов“ е непрооден поради големи количини вода од дождот, и на оваа сообраќајница има возила заглавени во водата.

Сообраќајот е во прекин и на потегот од крстосницата кај Горни Подлог до Градовска крстосница на магистралниот пат Кочани–Делчево.

Екипи на ТППЕ и полицијата се на терен и преземаат неопходни активности. Искршени стебла и гранки се забележуваат на повеќе локации, што дополнително го отежнува движењето.

Граѓаните се советуваат да останат во своите домови додека не дојде до смирување на состојбата.

Фото: прес-материјал од настанот