Сипаници кај овците: одгледувачите бараат да ги вакцинираат стадата, надлежните најавуваат 500.000 дози од Турција

Сточарите алармираат дека болеста сипаници кај овците брзо се шири и бараат итно да им се даде дозвола да ги вакцинираат своите стада. Денеска порака упатија пред Владата, од каде што потенцираа дека им требаат итни мерки за да се заштити сточниот фонд.

Од Сојузот на одгледувачи на овци побараа од Агенцијата за храна и ветеринарство (АХВ) да им овозможи самите да поставуваат вакцинација на фармите, а од Министерството за земјоделство, шумарство и водостопанство побараа превентивни активности и обесштетување за оние чиј стада веќе се уништени.

Како функционира системот за откривање и сузбивање

Министерството соопшти дека заедно со АХВ континуирано ја следи епидемиолошката состојба. Министерот Борче Серафимовски и директорот на АХВ Оливер Миланов се во постојана и непосредна координација, а службите секојдневно ги анализираат податоците од засегнатите региони и ефектите од преземените мерки.

Системот за рано откривање и сузбивање се спроведува преку ветеринарните друштва со кои АХВ има склучено договори за активности од јавен интерес. По пријава за сомнителен случај, официјалните ветеринари земаат крв и брисеви од животните и ги доставуваат на лабораториско испитување. Доколку биде потврден вирусот, директорот на АХВ донесува решение со кое се определуваат контролните и заштитните мерки во засегнатото одгледувалиште, вклучително и евтаназија на животните и нивно нештетно отстранување со закопување на одобрена локација.

Во меѓувреме, како донација од Република Турција се обезбедени 500.000 дози вакцина, кои се очекуваат да пристигнат во текот на деновите. До Европската комисија е доставено барање за дополнителни количини, а повторно е побарана стручна помош од тимот EUVET.

Министерството нагласува дека пред примена сите вакцини задолжително ќе бидат лабораториски испитани за безбедност и чистота и дека вакцинацијата ќе почне по добивање на потврдните резултати, согласно официјален план и под контрола на АХВ. Одгледувачите, пак, им препорачуваат на колегите максимално да ги заштитат животните и во овој период да не ги мешаат и зголемуваат трлата.

Фото: прес-материјал од настанот