Сите задоволни, но победник нема — Брвеница оди во втор круг

Во Брвеница никој не обезбеди апсолутна победа во првиот круг, но партиските соопштенија и од едната и од другата страна ја претставуваат избирачката активност како успех пред вториот круг на 1 ноември.

ВМРО-ДПМНЕ е задоволна од резултатот и порачува дека и покрај пад од 444 гласа во споредба со минатите локални избори, нејзиниот кандидат има предност од околу 800 гласа пред кандидатот поддржан од ДУИ и разлика во однос на кандидатот на СДСМ која е поголема од 4 спрема 1. „Вчера ВМРО-ДПМНЕ убедливо победи во Брвеница, со огромен резултат. Тоа е значајна победа за ВМРО-ДПМНЕ во Полошкиот регион. Во вториот круг очекувам уште поголема поддршка од граѓаните, без разлика на етничката припадност и уште подобар изборен резултат, за да ја заокружиме целосно победата на 1 ноември. Благодарност до граѓаните на Брвеница кои што излегоа и ја поддржаа победата на ВМРО-ДПМНЕ, со некаде отприлика 3.000 гласа. Очекувам таа бројка после вториот круг да се искачи на рекордни 4.000 гласа“, рече Христијан Мицкоски, премиер.

Во СДСМ истакнуваат дека нивниот кандидат добил 225 гласа повеќе во споредба со претходните избори и дека тоа претставува раст од 46 проценти, иако партијата се прикажува на четвртото место. Тие побараа и обвинителска истрага за тоа како резултатите од гласањето на болните и немоќни лица излегле во јавноста еден ден порано. „Болните и немоќните гласаат дома, во присуство на комисија. Кутиите се затвораат. Се носат. Се отвораат на денот на изборите, заедно со гласовите од избирачките места. Не се бројат претходниот ден. Не се објавуваат претходниот ден. Освен ако некој веќе „знае“ што има внатре. СДСМ бара обвинителство веднаш да спроведе истрага. Како е можно да се знаат гласовите од запечатените кутии што се отвораат во исто време со гласовите од избирачките места?“, праша Богданка Кузеска, портпаролка на СДСМ.

Толкувања и реакции

„Платформа 12.05“ ја оспоруваше официјалната интерпретација на резултатите, порачувајќи дека кандидатот на СДСМ добил 57 гласа помалку од советничката листа на партијата на локалните избори во 2025 година и дека освои повеќе гласови само од двајца независни кандидати. Тие ја поврзаа четвртата позиција со начинот на водење на партијата.

ДУИ преку соопштение го поздрави пласманот во вториот круг на Аркин Јахији, оценувајќи дека резултатот ја потврдува поддршката од граѓаните и ја нагласува потребата од локален развој и институции кои ќе им служат на сите.

Кандидатот на „Вреди“, Јакуп Хусеини, не успеа да влезе во вториот круг. Наместо кај коалиционите партнери, тој го посети изборниот штаб на Аркин Јахији и му го честиташе пласманот — гест кој јавноста го толкува како можна најава на поддршка пред финалната битка со кандидатот на ВМРО-ДПМНЕ. Портпаролот на „Вреди“ не посакал да открие кого ќе поддржи во вториот круг, наведувајќи дека одлуката ќе ја донесе претседателството на партијата, и оцени дека честитката на Хусеини е „висок демократски потег“. Во меѓувреме, Арбен Таравари од Алијансата за Албанците ги повика сите албански партии да гласаат за албанскиот кандидат поддржан од ДУИ.

Фото: прес-материјал од настанот