Qasja e lirë në bregdet: mbi 1,500 inspektime në Greqi, gjoba më e madhe 73,000 euro

Me përdorimin e dronëve dhe veglave moderne teknologjike, autoritetet greke forcuan inspektimet e bregdetit dhe realizuan mbi 1,500 kontrolle në më shumë se 300 plazhe dhe 450 biznese, si pjesë e zbatimit të kornizës ligjore për mbrojtjen e bregdetit dhe garantimin e hyrjes publike.

Kontrollet i kryejnë shërbimet e pronës shtetërore pranë Ministrisë së Ekonomisë Kombëtare dhe Financave, të cilat gjithashtu shqyrtojnë ankesat e qytetarëve të dorëzuara në telefon ose përmes aplikacionit MyCoast. Numri më i madh i ankesave është regjistruar në Halkidiki, në Kavala, në pjesën lindore të Attikës dhe në zonën më të gjerë të Athinës, në Ishujt Kikliadë dhe në Dodekanez, ku po kryhen kontrolle të drejtuara.

Inspektimet në terren shfaqin një rënie të ankesave, por edhe një seri gjobash të shqiptuara.

Sanksione të rëndësishme në Rodos dhe Zakynthos

Sipas ministrisë, ku konstatohet shkelje, zbatohet menjëherë sanksioni i parashikuar. Një biznes në ishullin Rodos mori vendim për mbyllje dhe gjoba në vlerë totale 73,000 euro për pengimin e qasjes në bregdet dhe për përdorim të paligjshëm të tokës së shtetit. Në Zakynthos, katër biznese u ndëshkuan me nga 2,000 euro secili për pengimin e qasjes në breg, ndërsa një tjetër biznes në të njëjtin ishull do të paguajë një gjobë prej 72,490.60 euro për përdorim të paligjshëm të plazhit.

Gjoba të tjera u shqiptuan në Halkidiki (pesë biznese) dhe në Kavala, ku një biznes që punonte pa kontratë të qiradhënies u dënuar me 15,912 euro gjobë.

"Është veçanërisht e rëndësishme që këtë vit është regjistruar numri më i ulët i ankesave në krahasim me vitet e mëparshme. Ky prirje, së bashku me pamjen nga kontrollet në terren, tregon një nivel të konsiderueshëm rritjeje të pajtueshmërisë së bizneseve me rregullat për përdorimin e bregdetit dhe plazheve," njoftoi ministria. "Kontrollet vazhdojnë gjatë gjithë sezonit veror. Qëllimi është ndërhyrje në kohë për çdo shkelje të konstatuar të ligjit, mbrojtje e karakterit publik të plazheve, të aksesueshme për të gjithë, dhe sigurim i qasjes së lirë për qytetarët në bregdet," theksuan nga ministria.

Foto: material shtypi nga ngjarja