Слободен пристап до крајбрежјето: изречени над 1.500 инспекции, највисока казна 73.000 евра

Со помош на дронови и современи технолошки алатки, грчките служби го засилија надзорот на крајбрежјето и ова лето спроведоа повеќе од 1.500 инспекциски контроли на над 300 плажи и во 450 бизниси во рамките на примената на законската рамка за заштита на крајбрежјата и обезбедување слободен пристап за граѓаните.

Инспекциите ги вршат службите за државен имот при Министерството за национална економија и финансии, а ги разгледуваат и пријавите од граѓаните, поднесени телефонски или преку апликацијата MyCoast. Најмногу пријави се регистрирани на Халкидики, во Кавала, во источниот дел од областа Атика и поширокиот регион на Атина, на Кикладите и во Додеканезите, каде што се спроведуваат насочени проверки.

Теренските контролни прегледи покажуваат намален број пријави, но и низа изречени казни.

Најголеми глоби на Родос и Закинтос

Каде што се утврдуваат прекршоци, веднаш се носат предвидените санкции. Бизнис на островот Родос доби решение за затворање и казни во вкупен износ од 73.000 евра за попречување на пристапот до крајбрежјето и за незаконско користење државно земјиште. На Закинтос, четири бизниси добија по 2.000 евра казна за попречување на пристапот до крајбрежјето, а друг бизнис на истиот остров, поради незаконско користење на плажата, ќе плати казна од 72.490,60 евра.

На Халкидики беа казнети пет бизниси, а во Кавала е изречена парична казна од 15.912 евра на бизнис што работел без договор за закуп.

„Особено важно е што годинава е регистриран најнизок број пријави во споредба со претходните години. Овој тренд, во комбинација со сликата од теренските контроли, укажува на значително зголемено ниво на усогласеност на бизнисите со правилата за користење на крајбрежјето и плажите,“ соопштија од Министерството. „Контролите продолжуваат во текот на целата летна сезона. Целта е навремена интервенција при секое утврдено прекршување на законот, заштита на јавниот карактер на плажите, достапни за сите и обезбедување слободен пристап на граѓаните до крајбрежјето,“ додадоа од Министерството.

Фото: прес-материјал од настанот