Me dëshminë e ekspertëve ndërtimor vazhdon gjyqi për zjarrin në diskotekën “Puls” në Kocani

Gjyqi për zjarrin vdekjeprurës në diskotekën Puls në Kocani vazhdoi sot në sallën e gjykimit në Idrizovo me paraqitjen e ekspertizës ndërtimore dhe me marrjen në pyetje të ekspertëve që e përgatitën atë.

Ekspertët: sistemet dhe procedurat e sigurisë dështuan

Në seancën e kaluar, eksperti gjyqësor dhe profesor në Fakultetin e Ndërtimtarisë pranë Universitetit Shën Kirili dhe Metodi (UKIM), Goran Markovski, i cili ishte dekan i fakultetit gjatë përgatitjes së ekspertizës, i tha gjykatës se vlerësimi ndërtimor "tregoji në mënyrë të pakundërshtueshme se në Puls sistemi, pra institucionet dhe individët, plotësisht nuk funksionuan dhe as standardet, as rregullat, as procedurat nuk u respektuan."

Markovski tha se ekipi nga Fakulteti i Ndërtimtarisë me keqardhje konstatoi se për mbrojtjen nga zjarri në pjesën e objektit ku ndodhej diskoteka ishin ndërmarrë zero masa. Ai shtoi se nuk kishte dalje të rregullta për evakuim, ndërsa sipas sipërfaqes kapaciteti ishte 363 persona, ndërsa natën e fatkeqësisë kishte mbi 600 vizitorë.

Për të përmbledhur pasojat e këtyre mangësive, Markovski i tha gjykatës: "Objekti nuk kishte ku të merrte frymë. E gjithë temperatura mbahej brenda. Nuk ishte marrë asnjë masë që do ta lehtësonte rrezikun apo efektet e një zjarri. Përkundrazi, disa masa vetëm e shumëfishuan temperaturën dhe e bënë të padurueshme brenda."

Për materialet e dërguara për analizë, Markovski tha se një mostër ishte stiroplasti (polistiren), që në rastin më të mirë mund të klasifikohet si material normalisht djegës dhe lëshon tym toksik dhe pika djegëse. "Materiali i dytë i dorëzuar është tervol ose lesh xhami dhe i përket Klassës A2 të materialeve jo të djegshme dhe është plotësisht i qëndrueshëm deri në 800 gradë Celsius, nuk digjet dhe nuk lëshon pika. Nga ndryshimi i ngjyrës mund të përfundohet se temperatura në klub kishte arritur të paktën 800 gradë Celsius. Si provë për këtë, ne gjetëm pjesë të mëdha të strukturës së çelikut të përkulura dhe të deformuara si pasojë e temperaturave kaq të larta, dhe gjetëm edhe shishe qelqi të shkrira, të cilat janë rezultat i temperaturave jashtëzakonisht të larta," tha Markovski.

Kur prokurori Darko Jakimovski iu drejtua me pyetje, Markovski tha se lidhjet shkak-pasojë janë të shumta dhe se, për fat të keq, nuk kishin gjetur të dhëna që të tregonin se ishin ndërmarrë masa për të zvogëluar pasojat — as sa i përket materialeve, as kontrolleve, as angazhimit të firmave të licencuara për ndryshime dhe mbikëqyrje profesionale, apo për dokumentacion të rregullt.

Me dëshminë e ekspertëve pritet të përfundojë paraqitja e provave nga Prokuroria. Gjyqin e udhëheq gjykatësja Dijana Gruevska-Ilievska, ndërsa aktakuzën e përfaqëson një ekip prej 15 prokurorësh publikë.

Zjarri në diskotekën Puls në Kocani më 16 mars 2025, gjatë performancës së grupit DNK, la të vdekur 63 persona dhe mbi 200 të plagosur — një nga tragjeditë më të rënda në historinë e fundit të vendit.

Foto: material shtypi nga ngjarja