Собранието ги усвои измените на Законот за јавните набавки

На 122. седница Собранието ги усвои измените и дополнувањата на Законот за јавните набавки, со цел модернизација на системот, зголемување на транспарентноста и конкуренцијата и поефикасно и поодговорно користење на јавните средства, соопшти Министерството за финансии.

Клучни решенија

Во пакетот мерки е предвидено унапредување на Електронскиот пазар на набавки од мала вредност за зголемување на неговата употреба и поттикнување на поголема конкуренција меѓу економските оператори. Исто така, се воведува задолжителна примена на критериумот „најдобар сооднос помеѓу цена и квалитет“, со што при изборот на најповолната понуда, покрај цената, ќе се земаат предвид и квалитетот и долгорочната оправданост.

Измените го зајакнуваат процесот на дигитализација преку проширување на надлежностите на Бирото за јавни набавки за користење современи дигитални алатки и решенија базирани на вештачка интелигенција. Министерството посочува дека тоа ќе овозможи поефикасно следење на постапките, навремено препознавање ризици и спречување можни злоупотреби. Дополнително се создава правна основа за воспоставување веб‑сервиси и автоматска размена на податоци со други институции и релевантни субјекти.

За зголемување на транспарентноста, законските измени воведуваат обврска за објавување известување за доброволна претходна транспарентност кај постапките со преговарање без објавување оглас во законски утврдените случаи, што ќе овозможи поголем увид на јавноста и на економските оператори и ќе поедностави одредени административни процедури.

Во насока на професионализација, е предвиден систем на континуирано професионално усовршување за службениците за јавни набавки, кој го заменува моделот на периодична ресертификација преку повторно полагање испит. Исто така, се усогласуваат вредносните прагови за примена на Законот со актуелните економски услови и растот на трошоците, а се ревидираат и надоместоците за жалбена постапка, при што се задржува принципот на достапна и ефикасна правна заштита.

Според Министерството за финансии, усвоените измени се дел од пошироките реформски активности за модернизација на системот на јавни набавки и негово усогласување со европските стандарди, вклучително и приоритетите утврдени во Реформската агенда и Планот за раст на Европската Унија за Западен Балкан. Крајната цел е поголема транспарентност, посилна конкуренција и поефикасно управување со јавните средства во интерес на институциите и граѓаните.

Фото: прес-материјал од настанот