Kuvendi zgjat gjendjen e krizës për naftën deri më 20 prill 2027, TVSH i ulur për dizel zgjatet deri më 20 tetor

Me 70 vota pro dhe pa vota kundër ose abstenime, Kuvendi miratoi vendimin për zgjatjen e gjendjes së krizës për naftën dhe derivatet e naftës deri më 20 prill 2027.

Qeveria: rreziqet për furnizimin mbeten

Në arsyetimin e dorëzuar në Kuvend, Qeveria thekson se arsyet për shpalljen e krizës mbeten të pandryshuara, pasi rreziqet dhe kërcënimet për mundësi të paqëndrueshmërive nuk janë tejkaluar. Kjo zgjatje e vazhdon masën e miratuar më 20 korrik të këtij viti, e cila skadon nesër.

Në fillim të këtij muaji, Grupi për Vlerësimin e Rreziqeve dhe Kërcënimeve shqyrtoi gjendjen e furnizimit me burime strategjike të energjisë. Për shkak të kërcënimeve të mundshme për çrregullime në treg dhe pengesave ose bllokadave të importit të naftës dhe derivatet e saj, Grupi rekomandoi që Komiteti Menaxhues të dërgojë në Kuvend propozim për zgjatje të gjendjes së krizës, në funksion të mbrojtjes së furnizimit për popullsinë.

Kryeministri Hristijan Mickoski rreth dhjetë ditë më parë njoftoi se gjendja e krizës do të zgjatet për edhe gjashtë muaj. Ai shtoi se nëse situata në tregjet ndërkombëtare qetësohet dhe rreziqet për furnizim veniten, gjendja e krizës do të hiqet.

Kuvendi më herët e kishte zgjatur gjendjen e krizës dy herë që kur ajo u shpall pas ngjarjeve në Lindjen e Mesme, të cilat çuan në ndërprerje të furnizimit në tregjet ndërkombëtare të naftës dhe karburantit. Kjo zgjatje i mundëson Qeverisë të koordinojë masat dhe të sigurojë furnizim të qëndrueshëm me energjente.

Nesër skadon edhe masa për uljen e TVSH-së për naftën dizel nga 18% në 10%, e miratuar nga Qeveria për të ndikuar te çmimet me pakicë të karburantit dhe për të zbutur presionet e jashtme të çmimeve. Masa e TVSH-së së ulët për dizel është zgjatur deri më 20 tetor.

Foto: material shtypi nga ngjarja