SPD propozon ndryshim kushtetues për të financuar përshtatjen ndaj nxehtësisë

Ministrat e Partisë Socialdemokrate të Gjermanisë (SPD) propozojnë ndryshim të Kushtetutës për të zgjatur mundësinë e financimit federal të masave për përshtatjen ndaj ndryshimeve klimatike, ndërsa vendi përballet me vala të nxehtësive, thatësira, zjarre në pyje dhe mungesë uji më të shpeshta.

Kjo është pjesë e një plani veprimi prej katër faqesh të përgatitur nga ministrat e SPD, partneri më i vogël koalicional në qeverinë e kancelarit Friedrich Merz. Dokumenti propozon një plan kombëtar për trajtimin e valave të nxehtësisë, ndryshime në ligjet për planifikimin urban dhe ndërtimin, si dhe mbrojtje më të fortë për punëtorët e ekspozuar ndaj temperaturave ekstreme.

Ministrat argumentojnë se ndryshimi kushtetues është i nevojshëm që Qeveria federale të mund të ndihmojë në financimin e masave që aktualisht për më shumë pjesë janë kompetencë e landeve federale dhe komunave. "Ndryshimi është një 'parakusht' që qeveria federale të marrë pjesë në financimin e detyrave të komunave ose të landeve federale 'dhe në këtë mënyrë, afatgjatë, në mënyrë ligjërisht të sigurt dhe të gjithanshme të kontribuojë në masat për përshtatjen ndaj ndryshimeve klimatike dhe ruajtjen e natyrës'," thuhet në dokument.

Deklarata u miratua nga ministrat e SPD përgjegjës për financat, mjedisin, punën dhe çështjet sociale, ndërtimin dhe zhvillimin. Dokumenti thekson se pasojat e ndryshimeve klimatike godasin njerëzit në mbarë botën dhe gjithnjë e më shumë Gjermaninë.

"Pasojat e ndryshimeve klimatike godasin njerëzit në mbarë botën, dhe gjithnjë e më shumë edhe ne në Gjermani", shkruan ministrat, duke renditur valat e nxehtësisë, thatësirat, zjarret në pyje, nivelet e ulëta të ujit, reshjet e dendura, përmbytjet, mungesën e ujit dhe ekspozimin ndaj rrezatimit ultravjollcë.

Blloku konservator CDU/CSU i kancelarit Merz deri tani ka reaguar me skepticizëm ndaj propozimeve; përfaqësues të partisë vënë në dyshim përfitimin praktik të ndryshimit kushtetues dhe theksuan vështirësinë për të siguruar shumicën e nevojshme prej dy të tretave në Parlament. Burime nga SPD thanë se propozimet do të diskutohen brenda koalicionit në ditët në vijim.

Dokumenti gjithashtu nënvizon kostot ekonomike: valët e nxehtësisë dhe thatësirat kushtojnë BE-së qindra miliarda euro.

Foto: Profimedia