СПД бара уставни измени за да се финансираат мерки против ефектите од топлотата

Германските министри од Социјалдемократската партија (СПД) предлагаат промена на Уставот за да ѝ овозможат на федералната Влада да учествува во финансирањето на мерки за прилагодување кон климатските промени, откако земјата се соочува со почести топлотни бранови, суши, шумски пожари и недостиг на вода.

Тоа е дел од акцискиот план од четири страници што го подготвиле министрите од СПД, помалку витален коалициски партнер во Владата на канцеларот Фридрих Мерц. Во планот се предлага национален план за справување со топлотните бранови, измени во законите за урбанистичко планирање и градење и поцврста заштита на работниците изложени на екстремни температури.

Министрите укажуваат дека уставната промена е потребна за федералната Влада да може да помага со финансирање на мерки што во моментот главно се во надлежност на сојузните покраини и општините. "Таквата промена е „предуслов“ федералната Влада да учествува во финансирањето на задачите на општините или сојузните покраини „и на тој начин долгорочно, правно сигурно и сеопфатно да придонесе за мерките за приспособување кон климатските промени и зачувување на природата", се наведува во документот.

Предлогот бил поддржан од министрите од СПД задолжени за финансии, животна средина, труд и социјални прашања, градежништво и развој. Во документот се нагласува дека последиците од климатските промени веќе ги погодуваат луѓето во светот и сè повеќе ја оптоваруваат и Германија.

"Последиците од климатските промени ги погодуваат луѓето низ светот, а сè повеќе и нас во Германија", напишаа министрите, наведувајќи ги топлотните бранови, сушите, шумските пожари, ниските водостои, обилните врнежи, поплавите, недостигот на вода и изложеноста на ултравиолетово зрачење.

Конзервативниот блок CDU/CSU на канцеларот Мерц засега беше скептичен: претставници на партијата доведоа во прашање практичната корист од уставната промена и предупредија дека ќе биде тешко да се обезбеди потребното двотретинско мнозинство во Парламентот. Од СПД соопштиле дека предлозите ќе бидат разгледани меѓу коалициските партнери во наредните денови.

Во документот исто така се посочува и економската димензија: топлинските бранови и сушите ја чинат ЕУ стотици милијарди евра.

Фото: Profimedia