Сточарите бараат обештетување поради овча сипаница која убила околу 7.000–10.000 овци

Одгледувачите на овци и кози денеска попладне во Штип ќе одлучуваат за следните чекори и за барањата што ќе ги поднесат до Владата и до Министерството за земјоделство, шумарство и водостопанство поради појава на овча сипаница, која според проценките на терен предизвикала угинување од 7.000 до 10.000 овци.

Сточарите бараат итно обештетување

На денешната прес‑конференција, претседателот на Сојузот на одгледувачи на овци и кози, Насер Џемаили, рече дека меѓу главните барања ќе биде брзо обештетување за сопствениците чиј имот е уништен од болеста.

„Веќе знаеме дека бројката е од седум до десет илјади овци, но не е целосна. Сигурно имаме и повеќе стада изгубени, гледаме дека веќе и сточарите се плашат да ги пријават случаите, затоа што поминува многу време до уништување на стадото и не знаат, не се сигурни, дали ќе им се обештетат тие стада. Никој од сточарите не сака да ги изгуби овците и да останат на улица. Така да, денеска ќе одлучиме со барањата, што побрзо да се обештетат изгубените овци“ – изјави Претседателот на Сојузот на одгледувачи на овци и кози, Насер Џемаили.

Според сточарите, бројката што се повикува засега е проценка и постои страв дека не сите загуби ќе бидат пријавени, бидејќи процедурите за уништување на заразените стада се бавни и има неизвесност околу тоа дали сопствениците ќе добијат компензација.

Тие најавија дека доколку институциите не ги прифатат нивните барања, ќе ги донесат своите животни пред Владата како форма на притисок. Поддршка на нивните барања им даде и Конфедерацијата на синдикални организации.

„Премиере, значи најитно што може, фати ја работата во свои раце, бидејќи стадата чекаат од трлата ги собираме и ги носиме пред влада. Многу е алармантна ситуацијата, за да може и тоа малку што остана овде, да го задржиме, да го сочуваме, да останат луѓето и да се занимаваат со тоа со што со векови и нивните дедовци и чукундедовци се занимавале е практично препорака од конфедерацијата“ – рече Гоце Делчев Тодев од Конфедерацијата на синдикални организации.

На собирот во Штип сточарите ќе ги финализираат барањата кои, покрај барањето за обештетување, најверојатно ќе го вклучуваат и барањето за побрза ветеринарна интервенција, појасни постапки за уништување и отстранување на угинатите животни и гаранции за забрзано исплаќање на надоместоците. Тие повикуваат на итен одговор од Министерството и од Владата за да се спречат понатамошни загуби и да се зачуваат живеалиштата во погодените рурални средини.

Фото: прес-материјал од настанот