Судир на два трговски брода кај Истанбул, се бараат десет членови на екипажот

Два трговски брода под турско знаме се судрија синоќа во Мраморното Море во близина на Истанбул, а контактот со еден од бродовите е изгубен — десет членови на екипажот се водат како исчезнати, соопштија властите.

„Бродот ‘Алсу’ под турско знаме, кој пловел кон егејското пристаниште Алиага, и бродот ‘Тугберк Имамоглу’, исто така под турско знаме, на пат кон црноморското пристаниште Карадениз Ерегли, се судрија синоќа во близина на истанбулската област Силиври“, се вели во соопштението од канцеларијата на гувернерот.

На местото на несреќата биле испратени бродови на крајбрежната стража и хеликоптери за пребарување и спасување. Од надлежните информираа дека на „Алсу“ не била забележана видлива штета, но дека не успеале да стапат во контакт со „Тугберк Имамоглу“ и неговите десет члена на екипажот.

Состојбата и сопственоста на бродовите

Според Трговската комора за поморска трговија на Истанбул, „Тугберк Имамоглу“ е во сопственост на компанијата Zeybe Denizcilik и плови како товарен брод, додека „Алсу“ — во сопственост на Ozpulatane Deniz Tasimaciligi — е хемиски танкер. Екипите продолжуваат да го пребаруваат делот од Мраморното Море во близина на Силиври.

Операцијата за пребарување и спасување, како што навеле властите, сè уште е во тек и засега не се објавени дополнителни информации за причините кои довеле до судирот.

Фото: Гугл мапс