Судовите во Англија и Велс ги забранија паметните очила на Meta

Судовите во Англија и Велс донесоа одлука да го забранат носењето на паметните очила на компанијата Мета во своите објекти, приклучувајќи се на низата ресторантски, театарски и пабски локали кои веќе ги забранија тие уреди поради загриженост за приватноста.

Службата на Неговото височинство за судови и трибунали (HMCTS) соопшти дека на секој што ќе се обиде да влезе во судските згради со овие очила тие ќе му бидат одземени при влезот и ќе му бидат вратени при напуштање на објектот. Одлуката важи за кривичните, граѓанските и семејните судови во Англија и Велс.

Причина и правна рамка

„Постојат јасни ограничувања за фотографирање и снимање видео во судовите и трибуналите, поради што употребата на очилата на ‘Мета’ е забранета“, изјави портпарол од службата. Одлуката доаѓа во контекст на фактот дека очилата може да снимаат видео додека се носат.

Во Обединетото Кралство фотографирањето или снимањето видео во судските згради без официјална дозвола е забрането и може да се санкционира како непочитување на судот, стои во образложението на службата.

Одлуката следува еден месец по сличната мерка најавена од судовите во Њујорк, кои претходно воведоа ограничувања за контроверзните очила. Продажбата на паметни очила на Мета расте, но расте и стравот од можни нарушувања на приватноста.

Некои критичари ги опишуваат уредите како „шпионски софтвер“, а пред одлуката на судовите, повеќе јавни и приватни простори веќе воведоа забрани за нивна употреба.

Фото: Инстаграм/raybanmeta