Çmimet globale të ushqimit në korrik në nivelin më të lartë që nga janari 2023

Çmimet globale të ushqimit u rritën përsëri në korrik dhe arritën nivelin më të lartë në rreth tre e gjysmë vjet, njoftoi në të premten Organizata e Ushqimit dhe e Bujqësisë e Kombeve të Bashkuara (FAO). Indeksi i çmimeve të ushqimit i FAO mesatarisht ishte 131,1 pikë në korrik, një rritje prej 0,6 për qind ndaj qershorit.

Pas një rënieje të lehtë prej 0,3 për qind në qershor që sinjalizonte stabilizim të përkohshëm, indeksi u rrit në mes të verës në nivelin më të lartë që nga janari i vitit 2023. Drithërat shënuan një rritje prej 3,4 për qind në korrik krahasuar me qershorin.

Çmimet e grurit u rritën për 5,8 për qind për shkak të shqetësimeve për eksportet nga zona e Detit të Zi dhe dëmtimeve të infrastrukturës eksportuese, si dhe frikës se valët e nxehtësisë së fundit mund të dëmtojnë të korrat. Çmimet e misrit u rritën gjithashtu ndjeshëm, me 3,6 për qind, nën ndikimin e motit të ngrohtë dhe të thatë në Brezin e Misrit të SHBA-së dhe çmimeve më të larta të energjisë në kushtet e tensioneve gjeopolitike.

Lënde të tjera: vajra, sheqer, produkte qumështi

Çmimet e tërshërës u ulën për 1,9 për qind për shkak të pritshmërive të favorshme për korrjet në Australi dhe në disa pjesë të zonës së Detit të Zi, ndërsa çmimet e orizit mbetën kryesisht të pandryshuara ndaj qershorit. Vajrat bimore u rritën 2 për qind në korrik, dhe indeksi i vajrave arriti nivelin më të lartë që nga qershori i vitit 2022.

Rritja e çmimeve të vajit të palmës dhe të sojës shtyu lart indeksin e përgjithshëm, megjithëse çmimet e vajit të lulediellit dhe të vajit të kolzës ishin më të ulëta se në qershor. Rritja e çmimeve të vajit të palmës pasqyron kërkesën e fuqishme për prodhimin e biodizelit në Indonezi dhe çmimet më të larta të naftës bruto.

Çmimet e sheqerit u rritën 5,6 për qind në korrik për shkak të shqetësimeve se moti i nxehtë dhe i thatë i zgjatur mund të dëmtojë korrjet në Bashkimin Evropian dhe se ndikimet e mundshme të El Niño mund të ulin prodhimin te prodhuesit kryesorë aziatikë. Produktet e qumështit ranë për 0,7 për qind, me ulje çmimesh për gjalpin dhe për pluhurin e qumështit pa yndyrë dhe me yndyrë, por djathi u rrit për herë të parë që nga korriku i vitit të kaluar për shkak të furnizimeve sezonale më të dobëta të qumështit në Bashkimin Evropian.

Çmimet e mishit ranë 2,8 për qind në korrik — rënia e parë mujore që nga fillimi i vitit — pasi zbritjet në çmimet e pulës, derrit dhe mishit të lopës i tejkaluan rritjet e mishit të dhenve të shkaktuara nga oferta e kufizuar eksportuese nga Oqeania dhe kërkesa globale e qëndrueshme.

Foto: Arhiva