ТАРОМ ризикува да ја врати државната помош од 95,3 милиони евра
Романија подготвува ревидиран план и разговара со инвеститори од Персискиот Залив, а рокот за реструктурирање истекува на 31 декември 2026 година.

Романската национална авиокомпанија ТАРОМ се соочува со ризик да биде принудена да ја врати државната помош од 95,3 милиони евра, која Европската комисија ја одобри на 29 април 2024 година, откако не беа исполнети делови од обврските за реструктурирање. Министерството за транспорт на Романија потврди дека започнати се прелиминарни разговори за финансиско стабилизирање и дека се бара продолжување на рокот за реструктурирање, кој истекува на 31 декември 2026 година.
Во соопштението министерството наведува дека се подготвува ревидиран план за реструктурирање, кој сè уште не е официјално доставен до Европската комисија. "Во моментов не постои негативна одлука на Европската комисија во врска со ревидираниот план", стои во соопштението.
Романскиот вицепремиер Маријан Неакшу во вторникот во интервју за телевизијата Антена 3 рече дека дел од обврските од претходниот план не биле исполнети и дека се водеа разговори со потенцијални инвеститори од регионот на Персискиот Залив. "Тие разговори во моментов се најнапредни и сметам дека имаме шанси да постигнеме договор", изјави Неакшу, без да ги открие имињата на заинтересираните страни.
Што се разгледува во преговорите
Меѓу прашањата за кои се разговара се бројот на вработени што би биле задржани, обновувањето на авионската флота, условите за инвестирање и идните односи со Националната компанија за аеродроми во Букурешт. Како алтернатива се разгледува и можност за спојување на ТАРОМ со компанијата што управува со аеродромите во Букурешт.
Ромската владината програма предвидува пред Европската комисија да се предложи ревидиран двогодишен деловен план, а во 2027 година да се спроведе конкурентна постапка за привлекување стратегиски инвеститор, кој би можел да му биде понуден пакет од 20 до 49 отсто од акциите или мнозински пакет.
Европската комисија на 29 април 2024 година одобри државна помош за ТАРОМ во висина од околу 95,3 милиони евра за да се направи компанијата финансиски одржлива: 45,77 милиони евра за зголемување на капиталот и 49,53 милиони евра за отпишување на долгот од претходно одобрен спасувачки заем, заедно со каматите и евентуалните курсни разлики.
Финансиските податоци покажуваат дека ТАРОМ ја завршила 2025 година со загуба од 288,1 милион романски леи, додека претходната година пријавила добивка од 286,9 милиони леи, остварена главно поради продажба на имот, вклучувајќи авиони и права за користење аеродромски термини за полетување и слетување. Приходите од продажба во 2025 година изнесувале 1,09 милијарди леи, што е намалување од 10,4% во споредба со претходната година.
Во октомври оваа година компанијата соопшти дека продала 33% повеќе авиобилети и превезла 21% повеќе патници во споредба со истиот месец лани, а продажбата на билети во периодот август–октомври пораснала за 15% на годишно ниво. Генералниот директор Кристијан Ангел ги повика патниците да продолжат да купуваат билети: "ТАРОМ ќе лета и следната година. Имаме големи планови за ТАРОМ." Компанијата во септември и октомври презеде два нови авиона Boeing 737 MAX.
Според објавените распореди на летови, во моментов нема редовна директна линија меѓу Скопје и Букурешт, а во досега објавените информации за реструктурирањето не се најавени откажувања на летови како последица од постапката.
Фото: прес-материјал од настанот


