Тинејџер уапсен откако ФБИ спречи планиран напад во трговски центар

ФБИ спречи планиран масовен напад во трговски центар во Минесота и уапси 18-годишник, по тајна операција во која агенти му продале автоматска пушка и муниција, велат федералните обвинители.

Осомничениот Шејкдун Абдулахи Мохамуд беше приведен во вторникот во парк во Ричфилд, откако на агент на ФБИ под прикритие, кој се претставувал како припадник на Исламска држава, платил 600 долари за автоматска пушка АК-47 и купил 200 куршуми, се вели во пријавата.

Надзор и мотив

Федералните истражители го следеле Мохамуд речиси две години. Според кривичната пријава, тој од декември 2024 година разменувал пораки со доверлив информатор на ФБИ. На почетокот планирал да замине во Сомалија за да се бори на страна на милитантите од Ал Шабаб, но поради недостиг на средства решил да изврши напад во САД.

Во пријавата е наведено дека Мохамуд неколкупати потврдил дека на 24 октомври ќе изврши напад во трговски центар, кога била закажана културна манифестација на етничката заедница Хмонг, и дека сака да убие немуслимани. Тој проценувал дека може да бидат убиени меѓу 30 и 60 лица. На прашањето дали е сигурен во својата намера, тој одговорил: "Да, 100 отсто сум сигурен".

Мохамуд беше изведен пред федерален суд во Сент Пол, каде што изјавил дека е невработен и нема дом, автомобил ниту средства на банкарска сметка. На сослушувањето го застапуваше федералната јавна бранителка Сири Карлсон Мекдауел.

Федералните обвинители велат дека операцијата на ФБИ ја спречила реализацијата на напaдот и дека случајот ќе се води пред судот во Сент Пол. Сојузниот обвинител Даниел Розен изјави дека агентите навреме ја откриле заканата и ја спречиле акцијата.

Фото: прес-материјал од настанот