Трамп го спомна Џо Бајден речиси 900 пати годинава

Доналд Трамп го спомнал името на Џо Бајден речиси 900 пати годинава, што го прави поранешниот претседател постојана цел на критиките додека републикарците се борат да ја задржат контролата во Конгресот на меѓуизборите во ноември.

Анализата на јавните говори, изјави, интервјуа и објави на Truth Social покажува дека Трамп во просек го именувал Бајден околу трипати дневно, поврзувајќи го со прашања кои опфаќаат од инфлација и имиграција до тврдења за недостиг од муниција, и тоа во период кога Бајден делумно се повлече од јавниот живот.

Фокусот на обвиненијата

Од 1 јануари, Трамп го спомнал Бајден најмалку 890 пати, распоредени на речиси 200 настани и интервјуа и околу 190 објави на Truth Social. Тој го поврзал Бајден најмалку 210 пати со економијата, 168 пати со имиграцијата и 138 пати со надворешната политика и националната безбедност, додека истовремено го обвинува и за други домашни проблеми.

Трамп го критикувал Бајден на различни настани, вклучително премиерата на филмот за Меланија Трамп и Националниот молитвен појадок. На самитот на НАТО во Турција во јули, тој постави рекорд со 16 спомнувања на Бајден за еден ден. Исто така, го обвини Бајден за недостиг на муниција и за растот на трошоците за домување.

„Демократите ви донесоа четири години катастрофа, хаос и смрт под поспаниот Џо Бајден“, им рече Трамп на верните членови на партијата на републиканската конвенција во Далас на 9 септември.

„На Доналд Трамп секогаш му треба некоја мета и подобро е тоа да е една личност отколку партија. Тоа го прави за да ги одврати сите проблеми со кои се соочува во моментот“, рече републиканскиот стратег Рајан Вилијамс.

„Џо Бајден е најлошиот претседател во американската историја, а претседателот Трамп секој ден го чисти неговиот неред и ги прави САД посилни од кога било“, рече Оливија Велс, портпаролка на Белата куќа.

Фото: АП)