Trump: Sulmet e Ukrainës dobësuan sektorin naftë të Rusisë, Moska po e humb kontrollin

Ish-presidenti amerikan Donald Trump tha se lufta në Ukrainë ka shkaktuar dëme serioze në sektorin energjetik rus dhe kërkoi ndërprerjen e konfliktit “absurd dhe të pafund” midis Moskës dhe Kievit.

"Rusia, fatkeqësisht, po humb kontrollin mbi industrinë e saj të karburanteve dizel për shkak të luftës me Ukrainën," tha Trump, duke theksuar se goditjet dhe ndërprerjet kërcënojnë aftësinë e Moskës për furnizim me produkte të rafinuara.

Gjatë muajve të fundit, sulmet ukrainase ndaj infrastrukturës energjetike ruse janë intensifikuar. Sipas vlerësimeve të industrisë, këto sulme kanë çaktivizuar thuajse gjysmën e kapaciteteve të rafinimit të naftës në Rusi.

Dëmtimi në një rafineri të madhe në Moskë

Një rafineri e madhe e Gazprom Neft në Moskë ndaloi përpunimin e naftës bruto pas sulmeve me dronë gjatë fundjavës, të cilat shkaktuan zjarre. Flakët goditën të dy njësitë kryesore të distilimit të naftës bruto dhe detyruan ndalimin e operacioneve kryesore.

Një burim tha se mund të nevojiten disa javë për riparimin e dëmeve dhe rifillimin e plotë të prodhimit, një afat që do të rrisë presionin mbi furnizimet e brendshme me dizel dhe do të vështirësojë logjistikën në Rusi.

Trump e përdori këtë zhvillim për të forcuar thirrjen e tij për përfundim të negociuar të konfliktit, duke paralajmëruar se vazhdimi i luftimeve shkakton dëme afatgjata për bazën industriale të Rusisë dhe për tregun energjetik global.

Foto: socijalni mrezhi)