Tre komisione të Kuvendit sot për ndryshimet në ligjet e mjedisit dhe të shërbyesve administrativë

Sot në Kuvend do të mblidhen tre komisione për të shqyrtuar ndryshimet e propozuara në dy ligje: ndryshimet në Ligjin për Mjedisin dhe në Ligjin për Shërbyesit Administrativë.

Komisioni për Transport, Transformim Digjital, Mjedis dhe Planifikim Hapësinor do ta shqyrtojë në lexim të dytë Projektligjin për ndryshim dhe plotësim të Ligjit për Mjedisin. Qëllimi kryesor i projektligjit është transpozimi i Direktivës 2014/52/BE për të forcuar procedurën e vlerësimit të ndikimit në mjedis (EIA), për të përmirësuar mbrojtjen e mjedisit, për të rritur efikasitetin e burimeve dhe për të mbështetur zhvillimin e qëndrueshëm.

Projektligji synon përputhjen me Direktivën 2014/52/BE të Parlamentit Evropian dhe Këshillit, datë 16 prill 2014, e cila ndryshon Direktivën 2011/92/BE për vlerësimin e ndikimeve të disa projekteve publike dhe private në mjedis (CELEX nr. 32014L0052). Për këtë projektligj janë paraqitur tetë amendamente nga deputeti i Levica, Sashko Janchev.

Ndryshimet për shërbyesit administrativë me procedurë të shkurtuar

Komisioni për Sistemin Politik dhe Marrëdhëniet Ndërmjet Bashkësive do të shqyrtojë Projektligjin për ndryshim dhe plotësim të Ligjit për Shërbyesit Administrativë me procedurë të shkurtuar. Ndryshimet janë propozuar për të siguruar një zbatim më të qartë, të njëtrajtshëm, efikas dhe ligjërisht të sigurt të rregullave, duke rregulluar statusin e shërbyesve në Shërbimin e Kuvendit dhe në trupat rregullatorë në të njëjtin nivel me shërbyesit e tjerë të posaçëm shtetërorë.

Projektligji gjithashtu eliminon mundësinë e ngritjes në detyrë të shërbyesve administrativë pa shpallje të një konkursi të brendshëm, duke siguruar qasje të barabartë dhe aplikimin e sistemit meritë. Ai saktëson kompetencat për përfaqësimin e Agjencisë në procedurat administrative dhe gjyqësore, përcakton afatet për dorëzimin e aktit dhe thjeshton procedurat përmes eliminimit të mbivendosjeve, me rregullime nënligjore dhe publikim transparent të rezultateve finale. Projektligji vendos një pasojë të qartë ligjore me të cilën shërbyesit administrativ që për dy vjet me radhë do të vlerësohen me notën "1 – nuk përmbush", i ndërpritet marrëdhënia e punës me efekt ligjor. Zbatimi i nenit 80 shtyhet deri më 1 janar 2028, ndërsa mbetet e mundur ankimi ndaj vendimeve dhe rregullohet përgjegjësia disiplinore dhe materiale.

Për këtë projektligj janë parashtruar dy amendamente nga deputetja e NSDP, Sonja Mirakovska, dhe një amendament nga deputeti i VMRO‑DPMNE, Bojan Stojanoski. Ndryshimet dhe plotësimet e propozuara do të shqyrtohen edhe nga Komisioni Ligjor‑Legjislativ i Kuvendit.

Foto: material shtypi nga ngjarja