Tre të vrarë, dhjetëra të plagosur nga sulmet ndaj aeroporteve në Riyadh dhe Abha

Tre persona u vranë dhe dhjetëra të tjerë u plagosën nga sulme që goditën dy aeroporte në Arabinë Saudite, njoftoi Autoriteti i Përgjithshëm i Aviacionit Civil i Arabisë Saudite (GACA). Objektivat ishin aeroportet në Riyadh dhe Abha, të goditura brenda një periudhe dyditore.

Sipas GACA, sulmi ndaj aeroportit të Abha në provincën Asir në jugperëndim të vendit shkaktoi vdekjen e dy grave, me shtetësi algjeriane dhe marokene, dhe plagosjen e 28 personave, përfshirë shtetas sauditë. Në sulmin mbi aeroportin në Riyadh u vra një shtetas i Sudanit, ndërsa tetë persona u lënduan. Të dyja goditjet shkaktuan dëme materiale.

Eskalimi dhe pretendimet

Autoritetet saudite nuk kanë dhënë detaje se kush qëndron pas sulmeve ose nga ku janë nisur. Hutitë, të cilët sipas vlerësimeve mbështeten nga Irani, më parë kanë marrë përsipër përgjegjësinë për sulmet ndaj aeroporteve në Arabinë Saudite dhe kanë njoftuar se të hënën kanë qëlluar me dy raketa balistike drejt Aeroportit Ndërkombëtar të Abha si pjesë e veprimeve të intensifikuara.

Këto incidente vijnë ndërsa lufta në Jemen ndërmjet forcave qeveritare dhe hutive është përshkallëzuar. Arabia Saudite mbështet qeverinë e njohur ndërkombëtarisht të Jemenit dhe ka kryer sulme ajrore kundër rebelëve.

Autoritetet jemeneze njoftuan se forcat e tyre nisën një sulm për të rimarrë zonat që i kishte nën kontroll hutitë. Ngjarjet rrisin shqetësimet për sulme të tjera ndërkufitare dhe rreziqet për aviacionin civil në rajon.

Foto: Printskrin