Тригодишно момче во ремисија од хепатобластом по експериментална GPC3‑CAR терапија

Тригодишно момче од САД е во целосна ремисија од агресивен рак на црниот дроб — хепатобластом — откако примило експериментална CAR T‑терапија насочена кон глипикан‑3 (GPC3). Лекарите наведуваат дека исчезнувањето на метастатската болест по само две амбулантски инфузии дава нова надеж за третманот на некои солидни тумори кај деца.

Предходни третмани и клинички детали

При дијагнозата, туморската маса во левиот лобус на црниот дроб имала димензии 11,2 x 9,6 x 7,1 сантиметри. Ракот се проширил на белите дробови, а постоеле и индиции за можно ширење на коските. Пред вклучувањето во испитувањето, детето поминало низ три циклуси на хемотерапија и хируршка отстранка на примарниот тумор, а потоа и две операци за отстранување на метастазите во белите дробови; и покрај тоа болеста рецидивирала.

Како учесник во прво‑во‑човек Фаза 1 студија CARE, момчето примило модифицирани CAR T‑клетки кои ја препознаваат глипикан‑3 (GPC3). Истражувачите исто така вградиле гени за експресија на интерлеукин‑15 и интерлеукин‑21 во клетките, врз основа на претклинички податоци дека овие цитокини можат да го продолжат преживувањето на CAR T‑клетките и да ја подобрат нивната антитуморска активност.

По првата инфузија, компјутерската томографија покажала делумен одговор, а нивото на маркерите во крвта се намалило. Осум недели подоцна била дадена втора инфузија. Подоцнежните снимки не покажале преостанати знаци на болеста, освен резидуални лузни на ткивото, а повеќе од една година по терапијата детето било целосно ослободено од карциномот. Авторите забележуваат дека карциномот целосно исчезнал по само две амбулантски инфузии без пријавени сериозни несакани ефекти или системска токсичност.

Авторите нагласуваат дека се работи за еден пациент вклучен во рана фаза на клиничкото испитување и дека се потребни поголеми студии и подолго следење за да се потврдат ефикасноста и безбедноста. Студијата CARE се спроведува на Baylor College of Medicine, а паралелно клиничко испитување IMPACT се одвива во Детската болница во Сиетл. Случајот е опишан во The New England Journal of Medicine.

Историски, CAR T‑терапиите покажале најголеми успеси кај хематолошките малигни болести, а не кај цврстите тумори. Истражувачите посочуваат дека малата оптовареност со болеста при рецидивот и локализацијата во белите дробови — каде што интравенски инфузираните CAR T‑клетки прво циркулираат — веројатно придонеле за високата антитуморска ефикасност, додека биле ограничени несаканите ефекти. Студијата укажува дека 15.21.GPC3‑CAR T‑клетките можат да претставуваат безбеден и ефикасен третман за хепатобластом позитивен на GPC3 и повикува на понатамошна проценка кај пациенти со солидни тумори.

„Резултатот кај детето со хепатобластом е охрабрувачки, но, потребни се поголеми студии и подолго следење за да се потврдат ефикасноста и безбедноста,“ вели во изјава за MIA доктор Игор Стојковски, директор на Клиниката за радиотерапија и онкологија.

Фото: прес-материјал од настанот