Учебниците се во училиштата: Јаневска очекува минимални поплаки за оштетени книги

Министерката за образование и наука Весна Јаневска соопшти дека учебниците за новата учебна година веќе се дистрибуирани до училиштата и дека оваа година распределбата е завршена многу порано отколку досега.

За времето на доставување, Јаневска изјави: „Учениците ќе имаат учебници, тие се дистрибуирани и се наоѓаат во училиштата. Првпат годинава тоа го имаме завршено многу порано пред почетокот на учебната година“,

Помалку пропусти по онлајн подготовките, смета министерката

На прашањето дали по 1 септември очекува поплаки за оштетени книги, министерката призна дека ќе има поплаки, но очекува тие да бидат ретки. „Не можам да кажам дека ќе нема. За жал, верувам дека и ќе има. Но, искрено верувам дека тоа ќе биде сведено на минимум и дека ќе биде инцидентно“, рече Јаневска.

Таа го поврза подобрувањето на пријавувањето и нарачувањето на заменски учебници со организираните онлајн подготовки за вработените во училиштата во изминатите три учебни години и со долготрајно отворениот електронски систем.

„Долго време беше отворен електронскиот систем оти тоа е начинот да бидеме сигурни дека работата ќе биде завршена како што треба. Сите што побараа ќе добијат и го добиваат она што побарале. Оние што не побарале е нивна одговорност и Министерството во иднина нема да презема никаква туѓа одговорност затоа што три години спроведуваме систем кој е стабилен и кој обезбедува стабилна набавка на учебници“, додаде Јаневска, одговарајќи на новинарски прашања по промовирањето на порталот „Е-наука“.

Според неа, училиштата треба да ги имаат побараните наслови на својот инвентар, а Министерството ќе ги испорачува порачките кои се внесени преку електронскиот систем, додека пропустите од оние кои не пријавиле се нивна одговорност.

Фото: прес-материјал од настанот