Ученик активирал солзавец за време на настава во „Лазар Личеноски“

Учeник од четврта година активирал солзавец за време на час по сликарство во средното уметничко училиште „Лазар Личеноски“, по што меѓу учениците настанала паника и страв, велат родителите. Родителот додава дека и една недела по инцидентот нема конкретна реакција од надлежните институции.

Како се случил инцидентот

Според пријавата, настанот се случил во ателјето каде се одржувала наставата, кога ученик од насоката сликарски дизајн активирал солзавец, со што биле загрозени здравјето и безбедноста на присутните.

Наставникот кој требало да предава тој ден не бил присутен бидејќи отсуствувал од работа. Исплашените ученици се обиделе да побараат помош од раководството на училиштето, но, според родителот, не успеале да стапат во контакт со одговорните лица.

Единствена непосредна помош им пружила класната раководителка, означена како Е. В., која, како што наведува родителот, веднаш интервенирала и презела мерки за заштита на учениците.

Родителот што го пријавил случајот бара одговорност и повикува надлежните да соопштат дали и какви мерки биле преземени. Засега нема податоци за дисциплински или истражни постапки поврзани со инцидентот.

Фото: прес-материјал од настанот