Ursula von der Leyen nesër në Shkup: Çfarë sjell vizita për zgjerimin dhe buxhetin

Ursula von der Leyen vjen në Shkup nesër, më 2 tetor 2026, për të përmbyllur një turë rajonale kushtuar rrugës drejt BE-së, integrimit të ngadaltë dhe Planit Evropian për Rritje. Vizita pason ndalesa në kryeqytetet e rajonit ku çështja e zgjerimit ishte qendrore.

Në Tiranë, von der Leyen e prezantoi strategjinë e re për zgjerimin dhe njoftoi se javën e ardhshme do të vendoset në tryezë edhe çështja e buxhetit të BE-së si pjesë e përgatitjeve për pranimin e anëtarëve të rinj.

Ajo që tha dhe çfarë sjell në valixhe

Ursula von der Leyen, Presidente e Komisionit Evropian: "Ju në Shqipëri po përgatiteni, dhe edhe ne po ashtu, sepse zgjerimi është një proces dypalësh, dhe Bashkimi Europian duhet të jetë i përgatitur për të pranuar anëtare të reja. Pikërisht për këtë, javën e ardhshme ne do t'i paraqesim atë që i quajmë rishikimet e politikave para zgjerimit, me fjalë të tjera, do t'i shqyrtojmë institucionet tona, do t'i shqyrtojmë politikat tona dhe, natyrisht, do ta shqyrtojmë edhe buxhetin tonë për t'u siguruar që Bashkimi Europian të jetë i gatshëm të zgjerohet dhe të pranojë anëtare të reja."

Në të njëjtën kohë, ministri i jashtëm i Gjermanisë bëri thirrje për përshpejtim të procesit të zgjerimit, duke paralajmëruar se ndikimi në rritje i Rusisë dhe Kinës në Ballkanin Perëndimor e bën më urgjente vendimmarrjen e Bashkimit. Johan Wadephul, Ministër i Jashtëm i Gjermanisë: "Zgjerimi i BE-së drejt Ballkanit Perëndimor është një provë kyçe për Evropën. Do të jetë vendimtar për ndikimin që do të ketë BE-ja në dekadat e ardhshme."

Në një raport të publikuar dje në Bruksel u bë e ditur se BE-ja planifikon të hapë tregun e vetëm për vendet kandidate dhe u shpreh shqetësim se vonesat e zgjatura mund t'i largojnë shtetet si Maqedonia e Veriut, Kosova, Bosnja dhe Hercegovina, Serbia dhe Turqia ose t'i orientojnë drejt aktorëve të tjerë të jashtëm. Raporti po ashtu thekson se Brukseli po përgatit "udhërrëfyes" për katër kandidatet e preferuara — Mali i Zi, Shqipëria, Ukraina dhe Moldavia — ndërsa Maqedonia e Veriut nuk është përfshirë në atë listë.

Kryeministri Hristijan Mickoski tha se nuk ka informacione për një vendim të tillë dhe se nuk e di nëse raporti është i saktë. Në Shkup, pritet që vizita e von der Leyen të adresojë çështje konkrete për rrugën drejt BE-së, mundësinë për përfshirjen e BE-së në dialogun me Bullgarinë dhe sinjalet politike lidhur me çdo mendim për ndryshime kushtetuese.

Foto: material shtypi nga ngjarja