Komuna e Karposhit do të marrë edhe 11 të punësuar në 2027, administrata pati ngarkesë të rritur

Këshilli i Komunës së Karposhit votoi planin vjetor të punësimeve për vitin 2027, me të cilin janë parashikuar 11 punësime të reja dhe për paga në nivel vjetor është planifikuar shuma prej rreth 5,2 milionë denarë.

Aktualisht në komunë ka gjithsej 184 të punësuar: 165 shërbyes administrativë dhe 19 staf teknik. Në këtë numër nuk përfshihen të punësuarit e përkohshëm në administratë dhe në pastrimin publik.

Në listën e propozuar nuk ka pozicione për inspektorat — çka e theksuan edhe këshilltarët e opozitës — por konkretisht janë të përmendura vende pune në disa sektorë. Janë parashikuar dy ndihmës-drejtues, një në Sektorin për mbështetje dhe organizim të punës së Këshillit dhe një në Sektorin e urbanizmit, me pagë vjetore nga nga 591.310 denarë. Dy vende të reja pune parashikohen në Sektorin për mbështetje të kryetarit, një në Sektorin për marrëdhënie me publikun, një në Sektorin për veprimtari të interesit publik për mbështetje të qytetarëve me nevoja të veçanta, tre në Sektorin për zhvillim të komunës (një në Njësinë për zanatçili, gastronomi dhe turizëm dhe dy në Njësinë për zhvillim ekonomik lokal), si dhe një kontabilist i ri fiskal dhe një person për përpunim dokumentacioni për taksën e pronës.

Përveç punësimeve të reja, shtatë nga stafi ekzistues janë në listë për avancim përmes shpalljeje të brendshme, ndërsa për vitin e ardhshëm janë parashikuar vetëm katër dalje në pension.

Vërejtje nga opozita: kërkohet analizë funksionale

Këshilltarët e opozitës dhe këshilltaret e pavarura shprehën vërejtje se në Komunën e Karposhit tashmë ekziston tepricë e punësimit dhe se më parë duhet të hartohet një analizë funksionale për të përcaktuar nevojat reale për stafin. Një nga vërejtjet ishte edhe mungesa e punësimeve të reja në inspektorat dhe në ekologji.

Këshilltari nga Levica, Slavko Mitevski, e përmbledhi qëndrimin e tij me fjalët: "Nuk pashë punësime në inspektorat dhe ekologji, por vetëm drejtues dhe zëvendësdrejtues të sektorëve. Arsyetimi është se është rritur volumi i punës, por me funksionimin aktual, nuk shoh që volumi është rritur, përveç nevojës që garnitura sunduese të vendosë stafin e saj."

Kryetari Sotir Lukrovski mbrojti planin, duke theksuar se disa të punësuar mund të dalin në pension ose ndoshta të ndryshojnë ambientin e punës dhe se shtyrja e miratimit të planit mund të pengojë funksionimin e administratës. Ai u përgjigj edhe për pyetjen lidhur me analizën funksionale: "Sa i përket analizës funksionale, është vetëm çështje nëse do ta bëjmë me kapacitetet tona ose me të jashtme, dhe do të kushtojë përafërsisht midis 150 dhe 200 mijë denarë. Shoh se disponimi është që të jetë një firmë e jashtme, do të bëjmë përpjekje të sigurojmë mjete dhe ta shpallim procedurën."

Nga Sektori për burime njerëzore shpjeguan se disa nga lëvizjet e propozuara në fakt janë plotësim i vendeve të lira të punës ose formalizim i vendeve të punës për persona që për vite punuan në të pambaruar ose me kontrata të përkohshme, dhe jo krijim i kategorive krejt të reja të vendeve të punës. Ky plan në fund u miratua me shumicë të udhëhequr nga VMRO-DPMNE.

Qytetarët që ndoqën debatet e seancës reaguan me pyetje nëse rritja e administratës do të përmirësojë drejtpërdrejt shërbimet për banorët. Një banor i Karposhit reagoi: "Çfarë përfitimesh do të kenë banorët e Komunës së Karposhit nga punësimet e reja?! Me çfarë do t9mi lehtësojë dhe përmirësojë jetesën të cilën e kam të garantuar me kushtetutë, por nuk e kam. Më mirë mjetet që mungojnë për zhvillimin e komunës, të shfrytëzohen për mirëqenie të përgjithshme të banorëve, më shumë parqe edukativo-kreative për fëmijë, investime për një komunë më të pastër."

Foto: Komuna e Karposhit