Vincent Kompany i liruar nga spitali, zbuluar shkaqet e shembjes

Trajneri i Bayern Munich, Vincent Kompany, është liruar nga spitali pesë ditë pasi u shemb në qendrën stërvitore të klubit. Sipas kontrolleve mjekësore, shkak i episodit ishte irritimi i membranave që rrethojnë trurin dhe palcën kurrizore, një gjendje që mund të shkaktojë spazma të dhimbshme të muskujve.

Max Eberl: Kompany do të vijojë rikuperimin në shtëpi

Drejtori sportiv Max Eberl tha se Kompany tashmë është lejuar të kthehet në shtëpi për të vijuar rikuperimin. "Mendoj se kjo është lajmi më i madh dhe më i mirë për të gjithë ne. Është përcaktuar se çfarë e shkaktoi gjendjen. Pikërisht irritimi i membranave çoi te incidenti i të premtes së kaluar. Ai tashmë u lejua të kthehet në shtëpi, ku do të vazhdojë rikuperimin. Në rastin e tij kjo do të thotë pushim dhe terapi me medikamente," tha Eberl.

40-vjeçari belg u dërgua në spital të premten e kaluar pasi u ndjeu keq gjatë ndjekjes së stërvitjes së ekipit të dytë të Bayern. Mediat gjermane raportuan se ai humbi ndjenjat dhe pati krampa gjatë rënies, duke shkaktuar edhe ç’pozicionim të shpatullës. Ende nuk është caktuar datë konkrete për rikthimin e tij në punë.

Në mungesë të tij, ndihmës-trajneri Aron Dans mori drejtimin e ekipit të parë dhe ishte në bankinë për fitoret ndaj Freiburg dhe Magdeburg. Eberl shprehu bindjen se Kompany së shpejti do të jetë sërish pranë vijës anësore, por theksoi se trajnerit do t'i jepet i gjithë koha e nevojshme për rikuperim. "Që nga fillimi flasim për javë", shtoi ai.

Kompany mori drejtimin e Bayern në 2024 dhe që atëherë ka udhëhequr klubin drejt dy titujve në Bundesliga. Para se t'i bashkohej gjigantit gjerman, ai ka punuar si trajner te Anderlecht dhe Burnley, dhe si lojtar kaloi 11 vjet te Manchester City, me të cilin fitoi katër tituj në Premier League.

Foto: material shtypi nga ngjarja