Вештак Марковски: Инспекторите вршеле надзор во „Пулс“ по пожарот

Вештакот Горан Марковски пред денешното рочиште рече дека инспекторите вршеле надзор во дискотеката „Пулс“ по пожарот во кој животот го загубија 63 лица, а над 200 беа повредени. Тој нагласи дека претходно, од 2012 година, нема записи за контроли на објектот.

Марковски откри дека дури на 16 и 18 март, по пожарот, се изготвени два записника. Документите се потпишани од Николчо Боцев и Љупчо Стаменков, двајца градежни инженери, а вештаците во потполност се согласуваат со содржината на тие записници.

Вештакот потврди дека во вештачењето нема наведени имиња и дека не може прецизно да се утврди кога биле извршени градежните интервенции, бидејќи тие биле изведени без дозвола.

Што покажуваат записниците

Марковски рече дека промената на намената била видлива порано: „Во 2019 година било видливо дека објектот претходно бил пренаменет бесправно од лесна индустрија во објект за дискотека што било јасно воочливо и од рекламата која стоела и стои над објектот,“ рече вештакот Марковски.

Во судскиот извештај е наведено дека за објектот било издадено одобрение за деловен објект за лесна индустрија, но повеќе од 15 години тој се користел за угостителска дејност — дискотека. При првичната контрола во Секторот за урбанизам при Општина Кочани нема податоци дека е издадено решение за пренамена и адаптација на објектот.

Марковски додаде дека инспекторот имал право и обврска да побара враќање на објектот во првобитна состојба, бидејќи немало проект и одобрение, а поради намената како дискотека објектот носел голем ризик за безбедноста на луѓето. Тој нагласи дека градежниот инспектор можел и требало да постапи за затворање додека не се отстранат неправилностите.

Вештакот околу два часа одговараше на прашања на обвинетиот инспектор Николчо Боцев, а родителите на жртвите во судницата видливо вознемирени го нарекоа „убиец“.

Фото: прес-материјал од настанот