VLEN: Rasti Laskarci është simbol i dështimit të drejtësisë — familjet e 16 viktimave ende presin drejtësi

Koalicioni VLEN vlerëson se rasti “Laskarci” është simbol i dështimit të drejtësisë, duke theksuar se shtatë vjet pas tragjedisë familjet e 16 viktimave ende presin drejtësi.

Reagimi erdhi pas vendimit të Gjykatës së Apelit për të anuluar aktgjykimin dhe për të kthyer rastin për rigjykim — një zhvillim që, sipas VLEN, mund të hapë hapësirë për vonesa të reja nëse çështja nuk trajtohet me prioritet.

VLEN: vonesa, ekspertiza dhe përgjegjësi institucionale

Koalicioni nënvizon se rasti “Laskarci”, së bashku me rastin “Durmo Turs” dhe një sërë dosjesh të tjera, është tregues i drejtpërdrejtë i gjendjes së sistemit gjyqësor, ku publiku ka qenë dëshmitar i shtyrjeve të dyshimta, raporteve mjekësore problematike dhe mosrespektimit të vendimeve të gjykatave.

“Besimi në sistemin gjyqësor, i cili ra në vetëm dy për qind, nuk u zhduk brenda natës. Super-ekspertiza për rastin Laskarci qëndroi 315 ditë në Zyrën për Ekspertiza Gjyqësore. Në krye të Zyrës në atë periudhë ishte Valdet Džaferi, funksionar i BDI-së. Kjo tregon se çështja nuk u vonua vetë,” tha VLEN.

Koalicioni kërkon të publikohet pa vonesë arsyetimi i vendimit gjyqësor dhe që dosja të trajtohet me prioritet, “pa lojëra të reja procedurale”, duke theksuar se familjet e viktimave nuk duhet të kthehen përsëri në fillim të procesit.

VLEN gjithashtu kërkon një reformë rrënjësore të gjyqësorit dhe vë në dukje se Ministri i ri i Drejtësisë ka nisur punën me vendosmërinë që raste të tilla të mos mbeten më peng i paaftësisë dhe abuzimeve në sistem.

Foto: material shtypi nga ngjarja