ВМРО‑ДПМНЕ бара од Обвинителството да истражи зошто биле исплатени 4,6 милиони евра во провизии за Коридор 8
Партијата тврди дека ревизорите утврдиле неефикасно управување и дека постои ризик од губење 61 милион евра за третата фаза.
ВМРО‑ДПМНЕ побара од Јавното обвинителство веднаш да отвори истрага откако, како што велат, во извештајот на Државниот завод за ревизија е утврдено дека државата исплатила 4,6 милиони евра провизии за средства кои не биле повлечени, додека проектот за железничкиот Коридор 8 останува незавршен.
Партијата укажува и на ризик од губење европски средства
Од ВМРО‑ДПМНЕ посочуваат дека ДЗР констатирал неефикасно управување и дополнително предупредил на сериозен ризик од губење 61 милион евра европски грант за третата фаза на Коридорот 8 поради нереализираната железничка инфраструктура.
Според партијата, ревизорите утврдиле дека првата и втората фаза од железницата воопшто не се завршени и дека роковите се целосно пробиени, поради што наместо модерна инфраструктура граѓаните добиле само милионски трошоци и нови државни долгови.
„ДЗР констатирал неефикасно управување, a дополнително предупредил и ризик од губење на 61 милион евра европски грант за третата фаза на железничкиот Коридор 8. Кој е одговорен за овие пропусти? Кој дозволил државата да плаќа милиони евра провизии? И кој ќе одговара ако со нечие постапување или непостапување е нанесена штета на државниот буџет?“ прашуваат од партијата.
Затоа, ВМРО‑ДПМНЕ бара од Јавното обвинителство детално да ги испита сите донесени одлуки, потпишани договори и спроведени постапки, да ги лоцира одговорните лица и да утврди дали постои основа за кривична одговорност.
„СДС и ДУИ не можат да се кријат и да молчат додека граѓаните ја плаќаат сметката за нивното катастрофално владеење во минатото. 4,6 милиони евра провизии, години доцнење незавршена железница и ризик за европски средства. Тоа е наследството од СДС и ДУИ“, заклучуваат од ВМРО‑ДПМНЕ.
Фото: прес-материјал од настанот
