Во Аеродром две училишта преминуваат на едносменска настава од септември

Од септември, две основни училишта во општина Аеродром ќе воведат едносменска настава: ООУ „Александар Македонски“ во Реонски центар и ООУ „Димитар Македонски“ во Лисиче.

Во училиштето „Александар Македонски“ во моментов се изведуваат градежни работи за доградба на три нови училници со кои ќе се овозможи едносменска настава. Инвестицијата е поддржана од Министерството за образование и наука во вредност од 2,2 милиони денари, а комплетното уредување на училниците е финансирано од Општина Аеродром.

Денеска градоначалникот Дејан Митески и министерката за образование и наука Весна Јаневска извршија обиколка во училиштето и увид во подготовките за почетокот на новата учебна година.

„Едносменската настава значи подобра организација на наставниот процес, повеќе време за учениците, наставниците и семејствата, но и повеќе можности училиштето да биде место за дополнителни активности, спорт, култура и развој на вештините на децата. Пред сè, тоа значи поквалитетни услови за учење, развој и безгрижно детство. Од 1 септември, и ООУ „Димитар Македонски“ во населба Лисиче воведува едносменска настава и за учениците од 6 до 9 одделение, со што продолжуваме да го унапредуваме образовниот процес и да создаваме подобри услови во училиштата на територијата на Општина Аеродром“, вели градоначалникот.

Митески информираше дека сите училишта во општината интензивно се подготвуваат за стартот на новата учебна година: пристигнати се учебниците за сите ученици и ќе им бидат распределени на првиот училиштен ден, а четвртоодделенците ќе добијат и таблет уреди кои веќе неколку години наназад се обезбедуваат од страна на локалната самоуправа и општинскиот буџет.

Училиштето „Гоце Делчев“ во Горно Лисиче се доградува и ќе добие нов систем за греење. Министерката Јаневска истакна дека две години се заложуваат за воведување едносменска настава каде што тоа е можно.

„Придобивките се повеќекратни – децата ја започнуваат наставата наутро, кога се повеќе концентрирани за учење. Се задржуваат подолго на училиште и треба да се задржуваат, бидејќи имаа 900 часа помалку од нивните врсници до 15 годишна возраст. Повеќе се социјализираат, што е важно особено за мултиетничките средини и училишта и се заштедуваат средства при работењето на училишните објекти“, рече министерката, додавајќи дека досега концептот го прифатиле над 200 училишта.

Фото: Општина Аеродром