Во американските операции во 2025 година загинаа 153 цивили, покажува извештај на Пентагон

Пентагон ѝ соопшти на Конгресот на САД дека во американските воени операции во текот на 2025 година загинале 153 цивили, а 243 биле ранети, соопшти денеска официјален претставник во врска со годишниот извештај на Министерството за одбрана.

Во извештајот се наведува дека сите евидентирани цивилни жртви во 2025 година биле последица на три американски воздушни напади во Јемен, каде што силите на САД извршуваат операции со цел да го намалат воениот потенцијал на бунтовниците Хути, кои добиваат поддршка од Иран.

Ова е драматичен пораст во однос на претходната година, кога во американските операции беа забележани по двајца загинати и ранети цивили.

Опфат и исклучоци

Годишниот извештај на Министерството за одбрана не ги вклучува жртвите од американските напади во акваторијата на Карибите и во источниот дел на Тихиот Океан, каде што американските сили ги напаѓаат пловилата за кои тврдат дека пренесуваат наркотици, а нивните екипажи ги означуваат како „нарко-терористи“.

Јавно достапните податоци објавувани по секоја од тие поморски операции покажуваат дека заклучно со септември 2025 година биле убиени повеќе од 200 лица на море.

Конгресот, преку годишниот закон за одбранбена политика од 2018 година, го задолжи Пентагон да поднесува таканаречените „извештаи 1057“ за цивилните жртви предизвикани во американските воени операции. Во првата година кога тоа беше задолжително, 2017 година, во операциите беа убиени речиси 500 цивили. Бројот значително опадна по повлекувањето од Авганистан — на еден загинат цивил во 2023 и двајца во 2024 година — но повторно порасна по големата минатогодишна операција против Хутите.

Меѓународните организации за заштита на човековите права, меѓу кои „Хјуман рајтс воч“ и „Амнести интернешнл“, оценуваат дека нападите врз цивилни и трговски пловила се незаконски и претставуваат кршење на меѓународното право. Во дел од извештајот се вели: "Американската војска цврсто се залага за ограничување на штетата врз цивилите, а Министерството за војна има силни резултати во почитувањето на законите на војната".

Пентагон ѝ наложи на воената индустрија итно да произведува повеќе оружје.

Фото: EPA-EFE/SHAWN THEW