Во Грција регистрирани 45 нови случаи на вирусот западен нил, три нови смртни случаи

Во изминатата недела во Грција се регистрирани 45 нови потврдени случаи на инфекција со вирусот западен нил, со што вкупниот број од почетокот на ова лето достигнува 110 случаи. Во најновиот неделен извештај националната здравствена агенција (ЕОДИ) пријави и три нови смртни случаи.

Клиничка слика и хоспитализации

Од вкупно 110 дијагностицирани оваа сезона, 81 пациент имале симптоми на зафатеност на централниот нервен систем — како енцефалитис, менингитис или акутна парализа, додека кај 29 случаи биле регистрирани благи симптоми или нема инволвираност на централниот нервен систем. Во моментов 35 лица се на болничко лекување, 61 пациент е отпуштен на домашно лекување, а за петмина не била потребна хоспитализација.

Од почетокот на летната сезона вкупно девет лица починале како последица на инфекцијата; сите починати биле на возраст над 65 години, со просечна возраст од 82 години.

„Според резултатите од епидемиолошкото истражување спроведено во 2010 година, на секој еден случај на инфекција со вирусот западен нил со зафатеност на централниот нервен систем соодветствуваат околу 140 лица инфицирани со вирусот што се со благи симптоми или без симптоми“, посочуваат од ЕОДИ.

По територија, најмногу случаи — вкупно 77 — се пријавени во областа Атика, поширокиот регион на Атина. Преостанатите 29 случаи се распределени меѓу Тесалија, други делови на Северна Грција и Пелопонезот; пет случаи се во фаза на епидемиолошко истражување.

Поради порастот на бројот на случаи во Атика, регионалните власти вчера соопштија дека ќе ги зголемат насочените активности против комарците за 30 отсто, со дополнителни прскања од копно и воздух. Првиот потврден случај за оваа сезона бил регистриран на почетокот на јули. Вирусот западен нил е присутен во земјата во летата од 2010 до 2014 и повторно од 2017 до денес; најголемиот епидемиски бран беше во 2018 година со 317 случаи и 51 смрт, а лани во Грција беа пријавени 96 случаи и девет смртни исходи.

Фото: Freepik