Во Кембриџ отвораат центар од 20 милиони фунти за развој на лекови со вештачка интелигенција

Во Кембриџ ќе се отвори нов истражувачки центар вреден 20 милиони фунти (над 23 милиони евра), каде што ќе се комбинираат вештачка интелигенција и напредни модели базирани на човечки ткива за забрзување на развојот на лекови. Проектот е финансиран од британскиот Совет за медицински истражувања (MRC).

Центарот ќе биде сместен во Институтот за матични клетки во рамки на биомедицинскиот кампус во градот и ќе поврзе лаборатории, клинички единици и индустриски партнери за да се зголеми веројатноста лабораториските откритија да прераснат во терапевтски решенија.

Во истражувањата ќе се користат модели базирани на човечки ткива и болести, органоиди—минијатурни структури одгледувани во лабораторија кои имитираат одредени функции на органите—запоредно со системи на матични клетки, биоинженерство, клинички испитувања и аналитички пристапи потпомогнати со вештачка интелигенција.

Побрзо преминување од лабораторија до клиника

Од Универзитетските болници во Кембриџ велат дека новиот центар треба да овозможи попрецизни начини за проучување на болестите, предвидување на нивниот развој и тестирање потенцијални терапии пред тие да стигнат до клинички испитувања врз пациенти. Проектот исто така има цел да ја намали зависноста од истражувања со користење животни.

„Со тоа што ги опфаќаат важните карактеристики на индивидуалните пациенти, овие човечки модели ни овозможуваат попрецизно да ги проучуваме болестите и да ги тестираме потенцијалните терапии пред тие да стигнат до клиничка примена“, вели професорот Матијас Цилбауер, еден од раководителите на центарот.

Центарот ќе го предводат Цилбауер и професорот Берти Гетгенс, директор на Институтот за матични клетки во Кембриџ. Тие посочуваат дека поврзувањето на болниците, истражувачките институти и индустријата треба да го забрза развојот на алатки кои попрецизно ја отсликуваат човечката биологија.

Истражувачи од Кембриџ веќе ја искористиле вештачката интелигенција за развој на вакцина дизајнирана да делува против широк спектар коронавируси — вклучително варијанти на Ковид и коронавируси кои ги инфицираат животните, а кои би можеле да предизвикаат идни глобални епидемии. Новиот центар има за цел да примени слични компјутерски и лабораториски методи за побрзо откривање и приоретизирање кандидат-лекови.

Фото: прес-материјал од настанот