Во Србија приведени три лица поврзани со Алта банка, сопственикот Давор Мацура обвинет
Јавното обвинителство тврди дека Мацура, со помош на двајца вработени, неовластено повлекол околу 45 милијарди динари од трезорот.
Во Србија се приведени три лица во врска со истрагата за Алта банка АД Белград, а како главен осомничен се јавува сопственикот на банката, Давор Мацура. Јавното обвинителство за организиран криминал и полицијата им одредиле мерка притвор до 48 часа.
Обвиненија за неовластено повлекување готовина
Според обвинителството, Мацура, до 31 октомври 2026 година, ја пречекорил својата службена надлежност и повлекол парични средства од трезорот во вредност од околу 45 милијарди динари, односно повеќе од 380 милиони евра.
Како соосомничени се наведени и Г.М., директор на Одделот за благајна и управување со готовина, и И.П., соработничка задолжена за благајничко работење. Обвинителството тврди дека тие им ги давале своите картици за влез во трезорот или влегувале заедно со Мацура, овозможувајќи неовластено изнесување на парите.
По наредба на Јавното обвинителство за организиран криминал, на 31 октомври и 1 ноември 2026 година се извршени претреси во службените простории на Алта банка и во станбените простории на Мацура, при што бил направен деталeн попис на преостанатата готовина во трезорот.
Операцијата била реализирана од припадници на УКП, СБПОК и Одделот за сузбивање на организиран финансиски криминал. На 27 октомври 2026 година обвинителството имало побарано од НБС податоци за трансфери на пари од Алта банка во странство.
Адвокатот на Мацура ја потврдил првичната вест и, според медиумските објави, посочил дека неговото сослушување пред обвинител во Јавното обвинителство за организиран криминал е закажано за утре по 12 часот. Обвинителството го товари Д.М. за злоупотреба на положбата на одговорно лице според член 227 став 3 во врска со став 1 од Кривичниот законик, додека останатите двајца се сомничат за помагање при извршувањето.
Вицегувернерите во Народната банка на Србија побарале обвинителството да ги испита околностите што довеле до одземање на лиценцата на Алта банка, се наведува во соопштението.
Фото: прес-материјал од настанот
