Вратен пристапот на CNN, Politico и MS NOW до Белата куќа

Федерален судија нареди враќање на пристапот до Белата куќа за новинарите од CNN, Politico и MS NOW, откако трите медиумски куќи побараа итно судско рочиште за повторно добивање на одземените акредитации.

Во поднесокот до судот, медиумите ја обвинија администрацијата дека "повеќепати ја прекршила" судската одлука со која привремено беше сопрена забраната што ја воведе претседателот Доналд Трамп.

Белата куќа во судски документ наведe дека пристапот почнал да се враќа „денеска нешто по 9 часот по локално време“.

Одлука заснована на правото на соодветна постапка

Трамп минатиот петок ја објави забраната, обвинувајќи ги трите медиуми дека објавуваат "измислици или лаги" за неговата администрација; подоцна Белата куќа ја посочи и националната безбедност како објаснување.

Федералниот судија Тимоти Кели привремено ја укина забраната, оценувајќи дека таа „веројатно ги прекршува уставните права за соодветна постапка“ на медиумите. Спорот влијаеше и врз телевизиското покривање на пречекот на кинескиот претседател Си Џинпинг.

Како знак на солидарност, телевизиските мрежи Fox News, NBC, CBS и ABC суспендираа заедничко обезбедување видео од настаните во Белата куќа. Над 50 медиумски организации од различни политички ориентации поднесоа и правен поднесок во поддршка на тужбата, меѓу нив Fox News, New York Times, Washington Post и Wall Street Journal.

И претходно имало обиди на американски администрации да ограничат пристап на некои медиуми: во 2009 година, администрацијата на Барак Обама се обиде да го исклучи Fox News од одредено интервју во системот на заедничко телевизиско известување, но по приговорите на другите мрежи, Fox News сепак доби пристап.

Фото: прес-материјал од настанот