Загина работник во напад врз нуклеарката Запорожје; Москва цел на над 860 дрона

Работник во нуклеарната централа Запорожје во Украина загина во напад со беспилотно летало, соопшти Меѓународната агенција за атомска енергија (МААЕ). Станува збор за заварувач кој работел во централната работилница за поправки на електраната.

Генералниот директор на МААЕ, Рафаел Гроси, го осуди нападот и порача дека секое загрозување на персоналот во нуклеарна централа е неприфатливо, повикувајќи ги страните на максимална воздржаност за да се спречи евентуална нуклеарна катастрофа. МААЕ има свој постојан тим во објектот за следење на безбедносната состојба.

Масовни напади со беспилотни летала врз Москва

Москва ноќеска беше цел на масовен напад со беспилотни летала, соопшти градоначалникот на руската престолнина, Сергеј Собјанин. Според неговите информации, во Московскиот регион биле испратени вкупно 862 дрона, од кои 170 биле соборени при приближувањето кон руската престолнина.

Руските сили за воздушна одбрана, според официјалните извештаи, пресретнале најголем дел од беспилотните летала. Нападот беше оценет како еден од најмасовните пријавени оваа година; претходно, ноќта меѓу 28 и 29 октомври беше регистрирана друга голема акција со околу 613 беспилотни летала.

Портпаролот на Кремљ, Дмитриј Песков, го оцени нападот како невообичаен со оглед на тоа што се случил за време на самитот Русија–Африка. Руските воени власти потсетуваат и на нападот ноќта меѓу 19 и 20 септември, кога биле уништени околу 1.600 дрона, од кои околу 450 биле насочени кон Москва.

Истовремено, хуманитарен конвој со храна, медицински материјали и друга помош тргна ноќеска кон градот Ољешки во јужна Украина, кој е под руска контрола. Во конвојот, според известувањата, ќе патуваат новинари од Франција, Италија, Русија, Украина и САД, а меѓу присутните е и руската комесарка за човекови права Лана Лантратова. Русија и Украина соопштија дека операциите за расчистување мини околу Ољешки се завршени, со што се создадени услови за доставување помош и евакуација на дел од населението.

Украинските власти исто така пријавија дека руските сили извршиле напади врз индустриски објект во близина на Кременчук, како и врз области околу Киев и Харков, предизвикувајќи пожари, во продолжение на смртоносните удари од претходниот ден.

Фото: прес-материјал од настанот