Захариев: Ќе се формира стручен тим за случајот со родилката од Штип

Директорот на Клиничка болница Штип, Златко Захариев, денеска се огласи за случајот со деветнаесетгодишната родилка Станка Михајлова, која остана во инвалидска количка по породување со царски рез во Штип.

Захариев појасни дека "постоперативниот тек бил уреден и пациентката била испишана во добра општа состојба."

По извесен период, пациентката повторно се јавила во регионалната болница со изразена слабост на долните екстремитети. Подоцна била утврдена промена во спиналниот канал на високо торакално ниво.

Формирање стручен тим и инспекција

Директорот смета дека состојбата не може да се поврзе со апликацијата на спинална анестезија при царскиот рез. Тој најави формирање стручен тим за ревизија на случајот и потенцираше: "ако се утврди лекарска грешка ќе има одговорност од персоналот и од него."

Министерството за здравство издаде налог за вонреден инспекциски надзор во сите здравствени установи каде што се лекувала Михајлова. Пациентката е мајка на две малолетни деца, а семејството јавно го обвинува здравствениот персонал за лекарска грешка.

Фото: прес-материјал од настанот