Западнонилска треска: пет хоспитализирани оваа недела, 55 случаи вкупно

Бројот на хоспитализирани од вирусот западнонилска треска опаѓа: неделава се хоспитализирани пет лица, а на Клиниката за инфективни болести потешко болни се 19 пациенти. Тројца се екстубирани и нивната состојба се подобрува, додека двајца се на респиратор.

Промена на епидемилошката мапа и надзор на птиците

„Станува збор за повозрасни мажи што имаат и други болести“, изјави директорот на Инфективна, Фадил Цана, опишувајќи ги најновите хоспитализирани.

Според статистиката што ја објави Министерството за здравство, досега има 55 случаи на заболени од вирусот, а 52 од нив биле на болничко лекување. Министерството потсетува дека вирусот се пренесува по убод од тигрест комарец.

Министерот за здравство Сашо Клековски рече дека картографирањето на болните сега е концентрирано во Скопје Север, што е промена во однос на почетокот на епидемијата кога најголем дел од заболени беа од јужниот дел на градот, кај Скопско Поле. Клековски соопшти и дека уште еден мртов гавран, пронајден во скопски Карпош, во близина на Драмски театар, е позитивен на вирусот.

„Ги замолувам граѓаните да пријавуваат мртви гаврани, не и птици во распаѓање. Во иднина ќе се фокусираме на мртвите птици надвор од Скопје“, рече Клековски, повикувајќи на соработка во системот за надзор.

Во земјата досега шест лица починаа од последици поврзани со вирусот.

Фото: прес-материјал од настанот