Fillon rindërtimi i Klinikës Universitare për Mjekësi Fizike në Shkup

Ka filluar rindërtimi i Klinikës Universitare për Mjekësi Fizike dhe Rehabilitim – Shkup, një investim vlerësuar 92.7 milionë denarë pa TVSH, i cili synon të përmirësojë kushte për pacientët dhe stafin mjekësor dhe të rrisë ndjeshëm efikasitetin energjetik të objekteve, bëjnë të ditur nga Ministria e Financave.

Është nënshkruar një Marrëveshje grantesh midis Ministrisë së Financave dhe Ministrisë së Shëndetësisë për realizimin e nën-projektit "Rindërtimi i Klinikës Universitare për Mjekësi Fizike dhe Rehabilitim – Shkup me masa për efikasitet energjetik", i cili do të zbatohet përmes Njësisë Projektore pranë Ministrisë së Financave, me fonde grant nga International Bank for Reconstruction and Development – World Bank dhe me një grant investimi nga Western Balkans Investment Framework (WBIF).

"Këto aktivitete janë pjesë e Komponentës 1b të Projektit, e cila përfshin rindërtim me masa për efikasitet energjetik të objekteve të autoriteteve qendrore dhe institucioneve publike shëndetësore. Rindërtimi do të përfshijë tetë objekte të ndërlidhura me njëra-tjetrën, me një sipërfaqe të ngrohur totale prej 7.247 metrash katrorë. Me investimin Klinika do të marrë zgjidhje moderne me efikasitet energjetik, kushte më të mira dhe më funksionale për punën e personelit mjekësor dhe kushte më cilësore për qëndrimin, trajtimin dhe shërimin e pacientëve," thanë nga Ministria e Financave.

Fusha e punimeve dhe masat e parashikuara

Punimet e parashikuara ndërtimore përfshijnë vendosjen e izolimit termik në fasada dhe konstruktime të çatisë, zëvendësimin e objekteve të vjetruara të stolarisë me stolari të re energjetikisht efikase, sanimin e pjesëve të objekteve dhe tualeteve, si dhe zëvendësimin e ndriçimit ekzistues me sisteme moderne LED me efikasitet energjetik.

"Në kuadër të rindërtimit do të modernizohen edhe sistemet për ngrohje dhe ftohje përmes instalimit të pompave të ngrohjes me efikasitet të lartë dhe konvektorëve me ventilator. Kështu do të zëvendësohet sistemi aktual i ngrohjes me naftë, gjë që do të kontribuojë në uljen e konsumit të energjisë, kosto më të ulëta për funksionimin e institucionit dhe reduktim të ndikimit negativ në mjedis. Me realizimin e projektit pritet një përmirësim i ndjeshëm i karakteristikave energjetike të klinikës, por edhe krijimi i një mjedisi shëndetësor më modern, më funksional dhe më cilësor për pacientët dhe stafin mjekësor," shtuan nga Ministria e Financave.

Rindërtimi i Klinikës vlerësohet si një investim i rëndësishëm në modernizimin e infrastrukturës publike shëndetësore dhe bën pjesë në aktivitetet më të gjera për përmirësimin e efikasitetit energjetik të objekteve publike, përdorim më efikas të fondeve publike dhe sigurimin e shërbimeve publike më cilësore për qytetarët.

Foto: material shtypi nga ngjarja