Зеленски подготвен за средба со Путин во Турција, очекува помош од Ердоган

Украинскиот претседател Володимир Зеленски изјави дека е подготвен да се сретне со рускиот лидер Владимир Путин во Турција и дека очекува турскиот претседател Реџеп Таип Ердоган да помогне во организирањето на разговорите, во интервју за Си‑ен‑ен Турк.

„Подготвени сме за оваа средба во Турција. Знам дека претседателот Ердоган има свои врски со Путин. Затоа поддржуваме одржување средба во Турција“ – рече Зеленски.

Причината за предлогот

Зеленски рече дека директните преговори на претседателско ниво се неопходни оти досегашните контакти меѓу делегациите и техничките работни групи не успеале да ја запрат војната. Според него, средба лице в лице би можела да помогне во решавањето на прашањата кои останале нерешени во преговорите на тимовите.

„Токму затоа сакам да се сретнам со него – како со личноста која ги донесува одлуките“ – изјави тој.

Како главни точки на можното заседание Зеленски ги наведе прекинот на огнот и механизмот за надзор на почитувањето на договорот, безбедносните гаранции, обновата на Украина и статусот на окупираните подрачја. Тој го отфрли барањето на Путин Украина да го предаде Донбас или да го признае Крим како руска територија, нагласувајќи дека такви отстапки би биле спротивни на уставот на Украина.

Претседателот зборуваше и за можноста за учество на самитот на лидерите на Г20 во Мајами во декември. Тој посочи дека Украина сè уште нема добиено официјална покана од Вашингтон, но дека постојат сигнали оти американскиот претседател Доналд Трамп може да ја покани Украина во рамки на иницијатива за ставање крај на војната. „Тоа е невозможно. Не можете да одлучувате за судбината на Украина без Украина“ – нагласи тој, отфрлајќи идејата други земји да носат одлуки за иднината на Украина без учество на Киев.

Фото: прес-материјал од настанот