Зеленски: Русија планира да распореди меѓу 30.000 и 50.000 севернокорејски војници

Украинскиот претседател Володимир Зеленски предупреди дека Русија планира да распореди меѓу 30.000 и 50.000 севернокорејски војници на територијата на Русија, што го оцени како нова и значајна ескалација на воената соработка меѓу Москва и Пјонгјанг.

"-Ако на почетокот се зборуваше за стотици, потоа за илјадници, сега е донесена одлука да има од 30 до 50 илјади Севернокорејци на територијата на Русија-," изјави Зеленски во интервју за украинскиот телефонски маратон.

Зеленски нагласи дека севернокорејските сили веќе стекнуваат искуство во современото војување, што Пјонгјанг би можел да го искористи во идни регионални конфликти или кризи во Азија‑Пацификот. Тој оцени дека Москва им овозможува на Северна Кореја пристап до современи воени знаења, технологии и искуство од бојното поле.

Последици надвор од Украина

Претседателот подвлече и дека Северна Кореја веќе ѝ доставувала муниција и ракети на Русија кои биле употребени во војната во Украина. Reuters неодамна објави дека севернокорејска ракетна единица од околу 90 припадници била распоредена во Воронежка област, со можност за испорака на балистички ракети и лансери.

Претходни објави ја проценуваат бројката на севернокорејски припадници испратени во Русија на околу 14.000–15.000, при што дел од нив останале во областa Курск. Доколку проценката на Зеленски од 30.000–50.000 се покаже точна, тоа би претставувало значително зголемување на директната воена поддршка од Пјонгјанг за Москва. Московските власти засега не ја потврдиле најновата проценка.

Во меѓувреме, Киев бара дополнително зајакнување на соработката со Јужна Кореја, особено во областа на противвоздушната одбрана и во сферата на беспилотните летала, како дел од напорите да ги зајакне своите одбранбени способности.

Фото: Принтскрин од видео на Зеленски