Gondola e Vodnos pritet të rifillojë muajin e ardhshëm, njofton Orce Gjorgjievski

Kryetari i Shkupit, Orce Gjorgjievski, njoftoi se gondola e Vodnos pritet të vihet përsëri në funksion muajin e ardhshëm, pasi përfundojnë punimet e rindërtimit dhe kontrollet e nevojshme të sigurisë.

Ai shkroi në Facebook se po kryhen punë për rikthimin e linjës dhe një rindërtim themelor i kabinave, dhe se pritet të arrijë motori që ishte dërguar në riparim jashtë vendit.

Inspektimi zbuloi mangësi serioze

Gjorgjievski tha se gjatë inspektimit u konstatuan mangësi serioze, të cilat, sipas tij, janë pasojë e mungesës së servisit të madh dhe mirëmbajtjes së rregullt nga drejtimet e mëparshme. Gondola nuk është në funksion që nga maji i këtij viti.

Ai e përmbledh situatën me fjalët: "Duhej një ndërhyrje e gjerë dhe thelbësore, e neglizhuar gati një dekadë. Për këtë arsye gondola u hoq nga përdorimi. Për mua, siguria e popullit tonë është para së gjithash. Këtu nuk ka kompromis."

Sipas tij, rindërtimi po bëhet për të siguruar një udhëtim të sigurt dhe funksionim të besueshëm të gondolës, të cilën ai e cilësoi si një nga përvojat e preferuara të qytetit të Shkupit. "Po rikthejmë atë që është lënë pas disa vite. Me përgjegjësi, me punë dhe me vepra. Po i rikthejmë shkëlqimin Shkupit," shkroi ai.

Gjorgjievski më parë kishte thënë në maj se gondola do të mbetet e mbyllur derisa të konfirmohet plotësisht se është e sigurt për përdorim, duke shtuar se nevojitet një defektim dhe servis i plotë, pa dhënë një afat të saktë për përfundimin e punimeve.

Foto: Printskrin