3000 стипендии за студентите: аплицирање до 20 ноември 2026

Министерството за образование и наука го отвори електронското пријавување за студентски стипендии за академската 2026/2027 година; пријавите треба да се поднесат најдоцна до 20 ноември 2026 преку порталот e-uslugi.mon.gov.mk.

Вкупниот број на стипендии останува непроменет во однос на лани и изнесува 3.000, но годинава се воведува нов модел на стипендирање со измени во категориите и распределбата на средствата.

Во рамки на 1.200 стипендии за социјална поддршка, првпат се предвидени посебни подкатегории: 50 стипендии за студенти со попреченост и 50 стипендии за студенти со ретки болести.

Воведена е и нова категорија од 1.050 стратешки стипендии наменети за студенти кои се запишани во области од особено значење за идниот развој на државата. Националниот совет за високо образование и научноистражувачка дејност донесе одлука на 3 ноември 2026 година со која се утврдени студиските програми од стратешки интерес: математика, физика, хемија, земјоделство, шумарство, наставна биологија и рударство.

Износи и критериуми

Дополнително се предвидени 750 стипендии за студенти со висок академски успех — студенти со просечен успех најмалку 8.50 кои континуирано ги исполнуваат академските обврски. За стратешките стипендии месечниот износ е 18.000 денари, а за социјалните и стипендиите за висок успех износот е 6.050 денари. Исплатата се реализира во текот на девет месеци од студиската година.

Покрај ова, во тек се и два други конкурси за академската 2026/2027 година: доделување 15 стипендии за студенти запишани во прва година на студиски програми по македонски јазик и поврат на средства за купен музички инструмент.

Фото: прес-материјал од настанот