Африкански бран ги зажари Македонија — врвот на жештините се очекува в четврток

Африканската воздушна маса од утре (вторник) ќе ја внесе Македонија во критична фаза на екстремно високи температури, а Управата за хидрометеоролошки работи (УХМР) предупредува дека врвот на топлотниот бран е очекуван в четврток.

Според УХМР, максималните дневни температури утре ќе се искачуваат во интервалот од 34 до 40 степени, а во Скопје живата во термометарот ќе достигне високи 39 Целзиусови степени. Метеоролозите најавуваат дополнително интензивирање на топлото и стабилно време во наредните денови, со можност во најтоплите предели и долж Повардарието температурата да надмине 41 степен во четврток.

Од утре навечер ќе се појават т.н. „тропски ноќи“ во урбаните средини, кога минималните температури нема да се спуштат под 22 степени, а УВ-индексот ќе биде екстремно висок и ќе изнесува 9. Здравствените власти апелираат за максимално почитување на препораките: заштита од директно сонце меѓу 11:00 и 17:00 часот, консумација на многу течности и зголемена бдителност поради енормно висок ризик од шумски пожари.

Состојбата во регионот

За македонските граѓани и туристи состојбата во соседството е подеднакво алармантна. Во Грција се очекуваат температури околу и над 41 степен, а силниот ветер дополнително ја отежнува борбата со огнените стихии. Најкритично е на островот Крит (регион Ретимно) и во пошироката околина на Атина, каде е прогласен највисок степен на тревога. Гаснењето беше дополнително отежнато по трагичниот инцидент кога два противпожарни хеликоптери се судрија при интервенција.

Албанското крајбрежје, популарно меѓу македонските туристи, ќе биде погодено од истиот антициклон: во центри како Саранда, Ксамил, Валона и Драч се очекуваат 38–41 степен, додека во внатрешноста и во Тирана температурите може да достигнат до 42 степени. Албанските метеоролошки служби издадоа предупредување за многу висок ризик од шумски пожари, а возачите кои патуваат кон плажите се советуваат да бидат внимателни поради зголемен ризик од дефекти на возилата во екстремни жештини.

На Јадранското крајбрежје африканскиот антициклон носи температури до 40 степени, а во делови од Босна и Србија се очекуваат и екстремни вредности до 45 степени. Покрај топлотата, Хрватска и Црна Гора се соочуваат со голем сообраќаен колапс на границите, со долги колони и повеќечасовни чекања, што дополнително е засилено од имплементацијата на новиот европски систем за влез/излез (EES). Патниците се советуваат да не тргнуваат без исправен климатски уред во возилото и со доволни залихи на вода.

Фото: прес-материјал од настанот