Африм Гаши го помина Илинден во Каиро, главен говорник на конференција против дискриминација

Претседателот на Собранието, Африм Гаши, го помина Илинден во Каиро, Египет, каде што учествуваше и настапи како главен говорник на Втората меѓународна конференција за борба против дискриминацијата. Конференцијата ја организираше Генералниот секретаријат на Лигата на арапските држави во соработка со ICESCO.

Според соопштението од прес-службата на Собранието, на форумот присуствуваа претставници на парламенти и влади, претставници на меѓународни организации, академици и религиски лидери. На дневниот ред беа теми како улогата на муслиманските заедници на Запад, промовирањето на толеранцијата и меѓурелигискиот дијалог, заштитата на човековите права, борбата против говорот на омраза и изградбата на култура на мир.

Во своето обраќање, Гаши го посочи примерот на Република Северна Македонија како земја во која меѓурелигискиот и мултиетничкиот соживот се вистинска реалност, додека различноста ја опиша како богатство и значаен темел за развој на демократско и инклузивно општество.

Улогата на парламентите

Тој порача дека борбата против секоја форма на дискриминација не е само заштита на една заедница, туку заштита на човечкото достоинство, еднаквоста, слободата на совеста и почитувањето на различностите, и ја нагласи улогата на парламентите и институциите во зајакнувањето на дијалогот и заштитата на основните права.

Во завршните дискусии, учесниците споделија искуства и предлози за унапредување на правните и образовните мерки кои ќе помогнат во превенцијата на дискриминацијата и говорот на омраза и во продлабочување на културата на мир во разноликите општества.

Фото: прес-материјал од настанот