Африм Гаши: Реакцијата за пресудата на водачите на ОВК е мој личен став

Претседателот на Собранието, Африм Гаши, изјави дека реакцијата што ја објавил по изрекувањето на пресудата за поранешните водачи на Ослободителната војска на Косово (ОВК) била негов личен став, а не официјален став на Собранието.

Гаши го кажа тоа обраќајќи се на новинарите на денешниот брифинг и повторно по завршувањето на редовната средба со претставниците на медиумите. Тој потсети дека објавата била поставена на неговиот личен фејсбук-профил на 16 септември, истиот ден кога Специјализираниот совет во Хаг ги изрече пресудите против Хашим Тачи, Јакуп Красниќи, Кадри Весели и Реџеп Селими.

Казни и пресуди

Специјализираниот совет во Хаг ги прогласи за виновни поранешните водачи на ОВК за воени злосторства извршени за време на конфликтот 1998–1999. Хашим Тачи и Јакуп Красниќи добија по 25 години затвор, Кадри Весели е осуден на 18 години, а Реџеп Селими на 13 години затвор.

Во својата објава на Фејсбук Гаши меѓу другото напиша дека тие „припаѓаат на славно поглавје во историјата на Косово“ и нагласи дека станува збор за првостепена пресуда на која е дозволена жалба. Тој истакна дека 16 септември е ден кога сите треба да застанат заедно, со достоинство и смиреност, и да ги поддржат семејствата на засегнатите.

Кога беа поставени прашања како ги разликува функцијата од личните уверувања, Гаши одговори дека тој својот став го објавил на личниот фејсбук-профил и дека во него ама никаде не се повикал на Собранието како институција чиј претседател е. 

„Очекувам и вие новинарите, и граѓаните да сфатат дека личноста Африм Гаши не може да биде 24 часа, и од политички аспект, само претседател на Собранието. И затоа свесен дека не го кажувам тоа од позиција на претседател на Собранието, тоа беше мој личен став од моето политичко минато и затоа беше јасно дека никаде не се повикав на Собранието или на институцијата. Затоа би сакал и вие и граѓаните да разберат дека тоа е мој личен став и не треба да се меша со функцијата која ја извршувам“, изјави претседателот на Собранието.

Реакцијата на Гаши предизвика остра критика од опозицискиот Социјалдемократски сојуз на Македонија (СДСМ), кој оценуваше дека позициите објавени на социјалната мрежа се крајно несоодветни за лице што извршува висока државна функција и ја претставува државата на патот кон ЕУ. Од друга страна, неговата партија Влен ја оцени пресудата како неправедна и неприфатлива.

Лидерот на ДУИ, Али Ахмети, исто така ја оцени пресудата како неправедна и длабоко разочарувачка, повикувајќи на воздржаност и единство и нагласувајќи дека битката за правда ќе продолжи во жалбениот процес. Претставници на Соединетите Американски Држави, Европската унија и Обединетото Кралство повикаа да се прифати и почитува хашката пресуда.

Фото: Принтскрин