Алијансата за Албанците: Владин спот за 35‑годишнината ја брише албанската заедница и албанскиот јазик

Алијансата за Албанците искажува длабока загриженост поради владин спот објавен по повод 35‑годишнината од независноста, во кој според партијата Албанците се речиси целосно исклучени, а албанскиот јазик целосно отсуствува.

Побара повлекување и нов материјал

Во соопштението, Алијансата оценува дека е неприфатливо официјален материјал, делумно финансиран и од даноците на албанските граѓани, да се гради врз едноетнички наратив што создава впечаток дека државата ѝ припаѓа само на една заедница.

Партијата потсетува дека Албанците биле нераскинлив дел од најважните политички и општествени процеси во земјата — од периодот на осамостојувањето, преку изградбата на демократските институции, интеграцијата во НАТО, па сè до патот кон Европската Унија. Нивниот придонес во политичкиот, економскиот, образовниот, културниот и општествениот живот е неспорен и не смее да биде занемарен или избришан од официјалниот наратив.

Алијансата бара Владата да го повлече спотот и да објави нов, достоинствен, репрезентативен и инклузивен материјал во кој ќе се почитува албанскиот јазик и достоинствено ќе биде прикажан придонесот на Албанците во историјата, изградбата и сегашноста на државата.

Во соопштението исто така се искажува жалење поради молкот на албанските претставници во Владата, кои и кога директно се засегнати достоинството, идентитетот и застапеноста на Албанците, избираат да молчат.

Како заклучок, Алијансата потсетува дека државата им припаѓа на сите нејзини граѓани и дека државната симболика треба да го потврдува тоа.

Фото: прес-материјал од настанот