Собрание: усвоен амандман за бришење на членот 13 од Законот за јавни набавки

Собранието попладнево, во рамки на 129. седница, го усвои амандманот за бришење на членот 13 од Предлог‑законот за изменување и дополнување на Законот за јавни набавки.

Амандманот го поднесоа пратениците Бојан Стојаноски, Дафина Стојаноска и Бране Петрушевски. Како што истакна Стојаноски, со оваа измена текстот се ускладува со укажувањата на претседателката Гордана Сиљановска‑Давкова.

Дискусија во Собранието и укажувањето на претседателката

„Со бришењето на овој член комплетно ги прифаќаме указите од претседателката и сметаме дека овој закон може непречено да биде усвоен, да го олесниме системот и да го направиме попрактичен, позаконски, потранспарентен и поцелоисходен за целата државна управа,“ рече Стојаноски.

Тој додаде дека законските измени се дел од Реформската агенда и нивната цел е унапредување на системот преку воведување дигитални алатки и вештачка интелигенција. Според него, тоа ќе го подобри процесот на јавни набавки, ќе ги намали ризиците од корупција и злоупотреби и ќе поттикне реализација на инфраструктурни и други проекти. Надлежностите на Бирото за јавни набавки се дополнуваат во делот на дигитални алатки и вештачка интелигенција како инструменти за подобрување на процесот и намалување на ризиците.

За збор се јави и Фатмир Битиќи од СДСМ, кој посочи дека опозицијата во текот на комисиската расправа веќе поднела ваков и уште неколку други амандмани. „Сето ова ќе беше како што вели Стојаноски, ако нема друга виситна. На комисиската расправа дадовме ист амандман како овој што вие сега го предлагате, баравме да не се смени членот 13, да останат претходните одредби за кои претседателката не ви го потпиша указот. Ова е можеби прв пат Законот за јавни набавки да се носи во собраниска процедура без јавна расправа. Подостоинствено ќе беше да го повлечете законот, да поднесете нови измени и да има јавна расправа наместо да велите дека еве, сте ја послушале претседателката зашто таа кажала дека ова е противуставно,“ рече Битиќи.

Сиљановска‑Давкова на 4 ноември испрати допис до Собранието во кој информира дека по внимателна анализа и консултации со експерти, во согласност со член 75 став 3 од Уставот, одлучила да не го потпише указот за прогласување на законските измени усвоени на седницата на 26 октомври 2026 година.

На Предлог‑законот за изменување и дополнување на Законот за јавните набавки се поднесени вкупно 2.158 амандмани. Како што најави претходно претседателот на СДСМ, Венко Филипче, партијата ќе се обиде да го блокира донесувањето на измените со речиси 2.000 амандмани.

Фото: прес-материјал од настанот