Австрија и уште 10 членки на ЕУ бараат 12-месечна пауза во носењето нови правила

Австрија ја предводи иницијативата на група од 11 земји-членки на Европската унија кои бараат 12-месечна пауза во усвојувањето на нови регулативи со цел да се даде приоритет на целосна имплементација и поедноставување на постоечките правила.

Иницијативата ја потпишаа Австрија, Германија, Данска, Италија, Литванија, Словачка, Словенија, Полска, Португалија, Унгарија и Чешка. Австриската министеркa за европски прашања Клаудија Бауер ја опиша идејата како „година на поедноставување“.

„Не можеме да продолжиме да поднесуваме нови законски предлози сè додека постојните правила не се целосно имплементирани,“ изјави Клаудија Бауер пред медиуми во Брисел. Таа предупреди дека, иако во Брисел постојано се подготвуваат омнибус пакети за намалување на административните бариери, тие не се доволни.

Предупредување за редоследот на законодавството

Бауер нагласи дека не треба да стане правило прво да се усвојуваат регулативи, а потоа низ низа дополнителни акти да се бара нивно поедноставување: „Поедноставувањето треба да започне пред усвојувањето на регулативите.“

Потписниците на иницијативата бараат сите закони предложени од Брисел да бидат подложени на ригорозна процена за да се утврди нивната соодветност и дали придонесуваат кон пошироката цел за зајакнување на економската конкурентност. Тие исто така бараат новите регулативи да се предмет на процена на влијанието на секои пет години.

Некои од потписничките земји исто така предлагаат значително намалување на оперативните трошоци на ЕУ, што би можело да оди рака под рака со намалување на обемот на законодавството.

Фото: прес-материјал од настанот